រុស្ស៊ី និងចិន បានធ្វើសកម្មភាពល្បាតរួមគ្នា នៅលើមហាសមុទ្រប៉ាស៊ីហ្វិកខាងជើង និងសមុទ្រ ប៊ែរីង (Bering) ដែលជាសមុទ្រតូចមួយនៃមហាសមុទ្រប៉ាស៊ីហ្វិកខាងជើង ក្បែរឆ្នេរនៃរដ្ឋអាឡាស្កា(Alaska)របស់សហរដ្ឋអាមេរិក។ប្រទេសទាំងពីរបានអនុវត្តការល្បាតរួមគ្នាជាច្រើននាពេលកន្លងមក ហើយរុស្ស៊ីតែងតែហោះហើរយន្តហោះទម្លាក់គ្រាប់បែករបស់ខ្លួននៅលើសមុទ្រ ប៊ែរីង នេះ ដែលទាក់ទាញការរិះគន់ពីសហរដ្ឋអាមេរិក។

ប៉ុន្តែការល្បាតរួមកាលពីថ្ងៃពុធសប្ដាហ៍នេះ គឺជាលើកដំបូងដែលនាំយកយន្តហោះទម្លាក់គ្រាប់បែកមកពីប្រទេសទាំងពីរធ្វើសកម្មភាពល្បាតរួមគ្នានៅតំបន់មហាសមុទ្រប៉ាស៊ីហ្វិកខាងជើង។

ទីក្រុងមូស្គូ និងទីក្រុងប៉េកាំង បាននិយាយថា ការល្បាតរបស់ខ្លួន មិនសំដៅលើភាគីទីបីណាមួយឡើយ ខណៈទីបញ្ជាការការពារដែនអាកាសអាមេរិកខាងជើង (NORAD) របស់សហរដ្ឋអាមេរិកនិងកាណាដា បាននិយាយថា យន្តហោះទម្លាក់គ្រាប់បែក ដែលខ្លួនស្ទាក់ចាប់ ស្ថិតនៅក្នុងដែនអាកាសអន្តរជាតិ ហើយមិនត្រូវបានគេមើលឃើញថាជាការគំរាមកំហែងនោះទេ។ ប៉ុន្តែសមាជិកព្រឹទ្ធសភារដ្ឋអាឡាស្កា លោកស្រីលីហ្សា ម៉ួកូស្គី (Lisa Murkowski)បានហៅព្រឹត្តិការណ៍នេះថាជា "ការបង្កហេតុមិនធ្លាប់មាដោយសត្រូវរបស់យើង" ដោយបន្ថែមថានេះជា "លើកដំបូងដែលពួកគេត្រូវបានស្ទាក់ចាប់ប្រតិបត្តិការជាមួយគ្នា" ។

ចិន បាននិយាយថា ការល្បាតមិនជាប់ពាក់ព័ន្ធនឹងស្ថានភាពអន្តរជាតិ និងតំបន់បច្ចុប្បន្នទេ។

ចំណែករដ្ឋមន្ត្រីការពារជាតិអាមេរិក លោកLloyd Austin បាននិយាយកាលពីថ្ងៃព្រហស្បតិ៍ ២៥ កក្កដា ថា ការល្បាតយន្តហោះទម្លាក់គ្រាប់បែករួមគ្នាដោយរុស្ស៊ី និងចិន នៅជិតរដ្ឋអាឡាស្កា របស់សហរដ្ឋអាមេរិក «មិនមែនជារឿងភ្ញាក់ផ្អើលទេ» ហើយកងទ័ពអាមេរិក «ត្រៀមរួចរាល់» សម្រាប់សមយុទ្ធស្រដៀងគ្នានេះ៕