បាល់ទាត់៖ ក្លិបសូលទីឡូអង្គរបានបំបាក់ក្លិបបាល់ទាត់នគរបាលជាតិ ៣ទល់នឹង២ ការប្រកួតកីឡាបាល់ទាត់ជម្រើសជើងឯកជាតិ រឺមិត្តហ្វូនខាំបូឌានលីគបង្គ្រាប់សប្តាហ៍ទី៦ ថ្ងៃទី០១ ខែកញ្ញានៅកីឡដ្ឋាន SRU ខេត្តសៀមរាប ដោយគ្រាប់បាល់ចុងក្រោយរបស់កីឡាករ រ័ត្ន សំណាង។
ជំនួបនេះលេងបានតែ ២៤នាទីម្ចាស់ផ្ទះសូលទីឡូអង្គរផ្តើមនាំមុខដោយគ្រាប់បាល់កីឡាករ ម្ចាស់អាវលេខ៣៣ រ័ត្ន សំណាង។ សូលទីឡូនៅតែធ្វើបានល្អបន្តទៀតរហូតដល់ជិតចប់ការប្រកួតតង់ទី១ ទៅហើយកីឡាករម្ចាស់អាវលេខ១៥ លី ឌុក បន្ថែមគ្រាប់នាំមុខ ២ទល់០ ឱ្យម្ចាស់ផ្ទះ។ ប៉ុន្តែនៅតង់ទី២ នាទីទី៧២ នគរបាលជាតិបានវាយបកតាមបាន ១គ្រាប់វិញដោយកីឡាករ Otani Soma។ លុះ ៣នាទីបន្ទាប់កីឡាករ អ៊ុល រ៉ាវី ម្ចាស់អាវលេខ១០ បន្ថែមគ្រាប់ស្មើឱ្យនគរបាលជាតិ។ ពិតជាអស្ចារ្យចុងតង់ទី២ កីឡាករ រ័ត្ន សំណាងស៊ុតគ្រាប់ទី២ របស់ខ្លួន និងជាគ្រាប់ជ័យជំនះរបស់សូលទីឡូអង្គរ។
តាំងពីបើករដូវកាលខែមិនារហូតពេលនេះ ក្លិបដែលមានមូលដ្ឋាននៅសៀមរាប សូលទីឡូអង្គរទើបតែរកបានជ័យជំនះមួយប្រកួតនេះទេ ពោល ១០ប្រកួតសូលទីឡូអង្គរឈ្នះ ១ប្រកួត ស្មើ ១ប្រកួត និងចាញ់ ៨ប្រកួតមាន ៤ពិន្ទុ ចំនែកនគរបាលជាតិ ៨ប្រកួតស្មើ ២ប្រកួត និងចាញ់ ៦ប្រកួតមាន ២ពិន្ទុ។ ប្រកួតបន្ទាប់ សូលទីឡូអង្គរនឹងប្រកួតជាមួយអង្គរថាយហ្គឺរថ្ងៃទី៤ ខែកញ្ញាខាងមុខ ខណៈនគរបាលជាតិធ្វើដំណើរទៅជួបព្រៃវែង៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
