អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គុយតឺរ៉េស (Antonio Guterres) បានអំពាវនាវកាលពីថ្ងៃព្រហស្បតិ៍ (២៥ កក្កដា) ឱ្យប្រទេសនានាដោះស្រាយភាពបន្ទាន់នៃការរីករាលដាលនៃកម្ដៅខ្លាំងដែលបណ្តាលមកពីបម្រែបម្រួលអាកាសធាតុ ប៉ុន្មានថ្ងៃបន្ទាប់ពីពិភពលោកបានកត់ត្រាថ្ងៃក្តៅបំផុតរបស់ខ្លួនក្នុងកំណត់ត្រា។

លោក Guterres បាននិយាយថា «កម្ដៅខ្លាំងគឺជាភាពមិនប្រក្រតីថ្មី។ ពិភពលោកត្រូវតែប្រឈមមុខដោះស្រាយនឹងកំណើនសីតុណ្ហភាពដ៏ក្ដៅគគុកនេះ»។ បម្រែបម្រួលអាកាសធាតុកំពុងធ្វើឱ្យរលកកម្ដៅកាន់តែញឹកញាប់ ខ្លាំងជាងមុន និងកាន់តែយូរជាងមុននៅទូទាំងពិភពលោក។

នៅឆ្នាំនេះ ស្ថានភាពដ៏ក្ដៅគគុកបានសម្លាប់អ្នកធ្វើធម្មយាត្រាក្នុងពិធីបុណ្យហាជី (Hajj) រាប់ពាន់នាក់ បិទសាលារៀនសម្រាប់កុមារប្រហែល ៨០លាននាក់នៅក្នុងទ្វីបអាហ្រ្វិក និងអាស៊ី ហើយបាននាំឱ្យមានការកើនឡើងនៃអ្នកចូលសម្រាកព្យាបាលនៅមន្ទីរពេទ្យ និងការស្លាប់ជាច្រើននៅក្នុងតំបន់ក្រីក្រ សាហែល (Sahel) នៅអាហ្វ្រិក។

ជារៀងរាល់ខែចាប់តាំងពីខែមិថុនា ឆ្នាំ២០២៣មក ឥឡូវនេះបានក្លាយជារយៈពេលក្តៅបំផុតចាប់តាំងពីកំណត់ត្រាបានចាប់ផ្តើមនៅឆ្នាំ១៩៤០ បើធៀបនឹងខែដូចគ្នាកាលពីឆ្នាំមុន នេះបើយោងតាមសេវាអាកាសធាតុរបស់សហភាពអឺរ៉ុប។

យោងតាមរបាយការណ៍ពីអង្គការពលកម្មអន្តរជាតិ (ILO) កាលពីថ្ងៃព្រហស្បតិ៍បានឱ្យដឹងថា ជាង ៧០ភាគរយនៃកម្លាំងពលកម្មសកល ពោលគឺប្រហែល ២,៤ពាន់លាននាក់ ឥឡូវនេះប្រឈមហានិភ័យខ្ពស់នៃកម្ដៅខ្លាំង។ ការឡើងកម្ដៅខ្លាំងពេកបានក្លាយជាមូលហេតុចំពោះការបង្ករបួសនៅកន្លែងធ្វើការដល់មនុស្សជិត ២៣លាននាក់នៅទូទាំងពិភពលោក និងមនុស្សប្រហែល ១៩.០០០នាក់បានស្លាប់ជារៀងរាល់ឆ្នាំ៕