ភ្នំពេញ៖ លោក Salman Ahmed នាយកទទួលបន្ទុករៀបចំផែនការគោលនយោបាយ នៃ​ក្រសួង​ការ​បរទេសសហរដ្ឋអាមេរិក សាទរចំពោះជំហរកម្ពុជា ក្នុងការឈើ​លើ​គោលការណ៍​ច្បាប់​អន្តរជាតិ​ផ្អែក​លើធម្មនុញ្ញ របស់អង្គការសហប្រជាជាតិ (UN) ពាក់ព័ន្ធទៅនឹង​សង្គ្រាម​នៅ​ប្រទេស​អ៊ុយក្រែន ។

នៅក្នុងជំនួបពិភាក្សាការងារជាមួយឯកឧត្តម ប្រាក់ សុខុន អនុប្រធានទី១ ព្រឹទ្ធសភាជាតិ កាល​ពីថ្ងៃទី២៥ ខែកក្កដា ឆ្នាំ២០២៤ លោក Salman Ahmed បានថ្លែងថា ជំហររបស់កម្ពុជានេះ គឺ​បាន​សបញ្ជាក់ពីគោលជំហរឯករាជ្យ និងអធិបតេយ្យភាពរបស់កម្ពុជា ហើយបានកោត​សរសើរ​កម្ពុ​ជា​ពី​ការចូលរួមវិភាគទាន ក្នុងការបញ្ជូនកងទ័ពមួកខៀវ ក្នុងបេសកកម្មរក្សាសន្តិភាពសកល ក្នុង​ចំនួនមួយគួរឲ្យស្ញប់ស្ញែង ។

ជាមួយនេះ លោកក៏បានវាយតម្លៃខ្ពស់ ចំពោះតួនាទីរបស់កម្ពុជា ក្នុងនាម​ជា​ប្រធាន​អាស៊ាន​កាល​ពី​ឆ្នាំ២០២២កន្លងទៅ ក៏ដូចជាកោតសរសើរ ចំពោះការដាក់​ចេញ​នូវ​វិធានការ​ក្នុង​ការ​ប្រយុទ្ធ​ប្រឆាំង​នឹង​ការរីករាលដាលនៃជំងឺកូវីដ-១៩ យ៉ាងមានប្រសិទ្ធភាព ។

ក្នុងឱកាសនោះ ឯកឧត្តម ប្រាក់ សុខុន បានរំលឹកពីកិច្ចពិភាក្សាប្រកប​ដោយ​ផ្លែផ្កា​ក្នុង​ដំណើរ​ទស្សន​កិច្ច​របស់រដ្ឋមន្ត្រីការពារជាតិអាមេរិក ក្នុងជំនួបជាមួយសម្ដេចតេជោ ហ៊ុន សែន ប្រធាន​ព្រឹទ្ធសភាជាតិ ដែលផ្ដោតពិសេសទៅលើការពង្រឹងទំនាក់ទំនងទ្វេភាគី និងការ​ពង្រីក​កិច្ច​សហ​ប្រតិបត្តិការ​ក្នុងយន្តការនានាបន្ថែមទៀត ។

ឯកឧត្តមក៏បានរំលឹកពីជំនួបជាមួយរដ្ឋមន្ត្រី និងអនុរដ្ឋមន្ត្រីការបរទេសសហរដ្ឋអាមេរិក នៅ​ទី​ក្រុង​វ៉ាស៊ីន​តោន កាលពីឆ្នាំ២០២២ ក្នុងពេលកម្ពុជាជាសហប្រធាន នៃកិច្ចប្រជុំកំពូលអាស៊ាន-អាមេរិក ដែលពេលនោះភាគីទាំងពីរ បានកត់សម្គាល់ពីចំណុចវិជ្ជមានជាច្រើន នៃកិច្ច​សហ​ប្រតិបត្តិការ​ទ្វេរភាគីកន្លងមក រួមមានវិស័យពាណិជ្ជកម្ម ការប្រឆាំងអំពើភេរវកម្ម កិច្ចការ​មនុស្ស​ធម៌ មាតុភូមិនិវត្តន៍នៃជនជាតិខ្មែរ ការបោសសំអាតមីន និងកិច្ច​សហ​ប្រតិបត្តិការ​ប្រយុទ្ធ​ប្រឆាំង​ឧក្រិដ្ឋ​កម្ម​ឆ្លងដែនជាដើម ។

គួរបញ្ជាក់ថា ក្នុងជំនួបនេះ ឯកឧត្តម ប្រាក់ សុខុន និងលោក Salman Ahmed បានឯកភាពគ្នា លើ​កិច្ចសហប្រតិបត្តិការល្អរវាងប្រទេសទាំងពីរ លើវិស័យអាទិភាពមួយចំនួន មាន​ដូច​ជា​វិស័យ​វិនិយោគ វិស័យវប្បធម៌ និងការអភិរក្សវត្ថុបុរាណ និងវិស័យដោះមីនជាដើម ដែលអាមេរិក​បាន​បន្ត​គាំទ្រក​ម្ពុជាក្នុងការបោសសំអាតមីន និងយុទ្ធភណ្ឌមិនទាន់ផ្ទុះ តាមរយៈការផ្ដល់​ជំនួយ​ប្រមាណ ១៩០លានដុល្លារអាមេរិក ចាប់ពីឆ្នាំ១៩៩៣មក ៕ អត្ថបទ បាន សុខរិទ្ធិ