រដ្ឋមន្ត្រីការបរទេសឥណ្ឌូណេស៊ី នៅក្នុងកិច្ចប្រជុំថ្នាក់តំបន់មួយកាលពីថ្ងៃព្រហស្បតិ៍ (២៥ កក្កដា) បានដាក់សម្ពាធភាគីជម្លោះនៅមីយ៉ាន់ម៉ា ជុំវិញការបដិសេធមិនយល់ព្រមចរចា ខណៈការប្រយុទ្ធកាន់តែខ្លាំងឡើងរវាងយោធាដែលកំពុងកាន់អំណាច និងសម្ព័ន្ធក្រុមប្រដាប់អាវុធ។

រដ្ឋមន្ត្រីការបរទេសនៃសមាគមប្រជាជាតិអាស៊ីអាគ្នេយ៍ (អាស៊ាន) បានធ្វើកិច្ចពិភាក្សាបិទទ្វារនៅប្រទេសឡាវ ដោយរដ្ឋមន្ត្រីការបរទេសឥណ្ឌូណេស៊ី លោកស្រី រ៉េតណូ ម៉ាស៊ូឌី (Retno Marsudi) បានសង្កត់ធ្ងន់ថា មីយ៉ាន់ម៉ានឹងនៅក្រៅប្លុករហូតដល់របបសឹកគោរពការប្តេជ្ញាសន្តិភាព ដែលបានធ្វើឡើងជាច្រើនខែបន្ទាប់ពីការដណ្តើមអំណាចនៅរដ្ឋប្រហារឆ្នាំ២០២១។

លោកស្រី Retno បានប្រាប់កិច្ចប្រជុំនេះថា៖ «មិនមានការរីកចម្រើនលើការអនុវត្តការឯកភាព ៥ចំណុចនោះទេ ហើយបើនៅតែមិនមានការរីកចម្រើនទៀត ការចូលរួមរបស់មីយ៉ាន់ម៉ាក្នុងកិច្ចប្រជុំធម្មតា និងកិច្ចប្រជុំកំពូលរដ្ឋមន្ត្រីការបរទេសអាស៊ាន ត្រូវតែរក្សានៅកម្រិតមិននយោបាយប៉ុណ្ណោះ»។

យោងតាមលោកស្រី Retno បានឱ្យដឹងថា តំណាងរបស់មីយ៉ាន់ម៉ានៅក្នុងកិច្ចប្រជុំបានដោះសារថា «អ្វីៗហាក់ដូចជាដំណើរការល្អណាស់ ប៉ុន្តែការពិតនៅលើសមរភូមិបង្ហាញផ្ទុយពីនេះ»។ យោងតាមអង្គការសហប្រជាជាតិ ប្រជាជនប្រមាណ ២,៦លាននាក់ត្រូវភៀសខ្លួនគេចពីការប្រយុទ្ធគ្នា ដោយរបបសឹកត្រូវបានថ្កោលទោសយ៉ាងទូលំទូលាយចំពោះការវាយប្រហារតាមអាកាសរបស់ខ្លួនលើតំបន់ជនស៊ីវិល៕