មន្ត្រីប្រទេសបង់ក្លាដែស បាននិយាយថា ខ្លួនភ្លេចដកស្លាកLogo របស់អង្គការសហប្រជាជាតិ ចេញពីយានយន្ត ក្នុងអំឡុងពេលដាក់បម្រាមគោចរអនុវត្តដោយកងទ័ព ដើម្បីទប់ស្កាត់អំពើហិង្សាដ៏បង្ហូរឈាម ដែលបានរាលដាលនៅទូទាំងប្រទេសកាលពីសប្តាហ៍មុន និងបានសម្លាប់មនុស្សជិត១៥០ នាក់ ខណៈប្រព័ន្ធផ្សព្វផ្សាយមួយចំនួនបានរាយការណ៍ថា មានអ្នកស្លាប់រហូតដល់ជិត២០០នាក់។

អង្គការសហប្រជាជាតិ បាននិយាយថា ខ្លួនបានស្វែងរកការឆ្លើយតបពីអាជ្ញាធរទីក្រុង Dhaka បន្ទាប់ពីវីដេអូ ដែលត្រូវបានថតដោយអ្នកសារព័ត៌មាន Reuters កាលពីថ្ងៃអាទិត្យ ទី២១ ខែកក្កដា បានបង្ហាញនូវអ្វីដែលមើលទៅជាយានរថពាសដែកដែលមានអក្សរ «UN»។

យានយន្តនេះ បានដឹកទាហានមានកាន់កាំភ្លើងនៅតាមដងផ្លូវក្នុងទីក្រុង Dhaka ដែលកាលពីសប្តាហ៍មុន បានឃើញការប៉ះទង្គិចគ្នាយ៉ាងបង្ហូរឈាមរយៈពេលជាច្រើនថ្ងៃ ខណៈកងកម្លាំងសន្តិសុខ បានបង្ក្រាបការតវ៉ាដឹកនាំដោយនិស្សិតប្រឆាំងប្រព័ន្ធកូតាការងារដែលបម្រុងទុកសម្រាប់ការងាររដ្ឋាភិបាល។ រដ្ឋមន្ត្រីក្រសួងការបរទេសបង់ក្លាដែស លោក Hasan Mahmud បាននិយាយទៅកាន់អ្នកសារព័ត៌មានថា យានយន្តមួយចំនួនត្រូវបានជួលទៅឲ្យបេសកកម្មរក្សាសន្តិភាពអង្គការសហប្រជាជាតិ។

លោកបាននិយាយបន្ថែមថា «យើងភ្លេចដកឡូហ្គោចេញ» ហើយនៅពេលនេះឡូហ្គោត្រូវបានដកចេញហើយ។ រដ្ឋាភិបាលរបស់នាយករដ្ឋមន្ត្រី លោកស្រី Sheikh Hasina បានផ្អាកសេវាអ៊ីនធឺណិត និងបានអំពាវនាវឱ្យកងទ័ព អនុវត្តបម្រាមគោចរ ចាប់ពីពាក់កណ្តាលអធ្រាត្រកាលពីថ្ងៃសៅរ៍។

ក្រុមនិស្សិត កំពុងតវ៉ាប្រឆាំង ព្រោះតែតុលាការជាន់ខ្ពស់ កាលពីខែមុន បានបដិសេធសេចក្តីសម្រេចរបស់រដ្ឋាភិបាលលោកស្រី Hasina ក្នុងការលុបចោលប្រព័ន្ធកូតា ៥៦ ភាគរយ ក្នុងការងាររបស់រដ្ឋាភិបាល ដោយបានដាក់ឲ្យដំណើរការឡើងវិញ ក្នុងអំឡុងពេលមានវិបត្តិឥតការងារធ្វើ នៅក្នុងប្រទេស។

ប៉ុន្តែការតវ៉ា ត្រូវបានបញ្ឈប់ បន្ទាប់ពីតុលាការកំពូល កាលពីថ្ងៃអាទិត្យ បានចេញសេចក្តីសម្រេចគាំទ្រការប្តឹងឧទ្ធរណ៍ពីរដ្ឋាភិបាល និងបានលុបចោលប្រព័ន្ធកូតាភាគច្រើន ដោយបានបង្ហាញថា ៩៣ ភាគរយនៃការងារ នឹងបើកចំហសម្រាប់ការប្រកួតប្រជែង។ អង្គការសហប្រជាជាតិ ក្រុមសិទ្ធិមនុស្សអន្តរជាតិ សហរដ្ឋអាមេរិក និងអង់គ្លេស ស្ថិតក្នុងចំណោមអ្នកដែលរិះគន់ការប្រើប្រាស់កម្លាំងប្រឆាំងក្រុមបាតុករ ហើយបានស្នើឱ្យទីក្រុង Dhaka ប្រកាន់ខ្ជាប់នូវសិទ្ធិក្នុងការតវ៉ាដោយសន្តិវិធី។