ជនភៀសខ្លួនជាច្រើនគេចចេញពីចំហេះព្រៃ ដែលកំពុងឆេះនៅទីក្រុង Jasper ប្រទេសកាណាដា បានភៀសខ្លួនទៅកាន់ទីក្រុង Calgary កាលពីថ្ងៃព្រហស្បតិ៍ ប៉ុន្តែមួយចំនួនបានបែរចេញភ្លាមៗ ដោយសារបញ្ហាបុគ្គលិក ធ្វើឱ្យអ្នកភៀសខ្លួនដែលកំពុងស្វែងរកទីជម្រក មានការខកចិត្ត។

អាជ្ញាធរបាននិយាយថា ចំហេះព្រៃដ៏ខ្លាំងបានបំផ្លិចបំផ្លាញទីក្រុងទេសចរណ៍ Jasper ភាគខាងលិចប្រទេសកាណាដា ដែលអាចបំផ្លាញរចនាសម្ព័ន្ធរហូតដល់៥០% ហើយក្រុមអ្នកពន្លត់អគ្គីភ័យកំពុងព្យាយាម ដើម្បីជួយស្រោចស្រង់អគារជាច្រើនកន្លែងតាមដែលអាចធ្វើទៅបាន។

ជាមួយគ្នានេះ យោងតាមមន្ត្រីពន្លត់អគ្គិភ័យរដ្ឋកាលីហ្វ័រនីញ៉ា បានឱ្យដឹងថា អគ្គិភ័យនៅឧទ្យានមួយកន្លែងដែលកំពុងឆេះនៅជិតទីក្រុង Chico ភាគខាងជើងរដ្ឋកាលីហ្វ័រញ៉ា បានឆាបឆេះលើផ្ទៃដីទំហំ រាប់រយហិចតា ហើយបច្ចុប្បន្នត្រូវបានគ្រប់គ្រងត្រឹមតែ៣% ប៉ុណ្ណោះ។

អគ្គិភ័យ ដែលបានឆាបឆេះកើនឡើងយ៉ាងឆាប់រហ័ស ដោយសារតែខ្យល់បក់ខ្លាំង និងលក្ខខណ្ឌស្ងួត។

ទន្ទឹមនឹងនេះ យោងតាមប្រព័ន្ធត្រួតពិនិត្យចំហេះព្រៃ នៅប្រទេសបូលីវី បានឱ្យដឹងថា ចំហេះព្រៃ បានបំផ្លាញតំបន់នៅទីក្រុង Santa Cruz ភាគខាងកើតរបស់ប្រទេសបូលីវី ដោយបានបំផ្លាញផ្ទៃដីជាង ៣០០.០០០ហិកតា។ យោងតាមលោកស្រី Julieta Valverde នាយកផ្នែកធនធានធម្មជាតិនៃរដ្ឋាភិបាលទីក្រុង Santa Cruz បាននិយាយឲ្យដឹងថា ក្រុង San Matias និង Robore គឺជាក្រុងដែលរងផលប៉ះពាល់ខ្លាំងបំផុតដោយចំហេះព្រៃ។