បេក្ខភាពប្រធានាធិបតីមកពីគណបក្សសាធារណរដ្ឋ លោក Donald Trump កាលពីថ្ងៃព្រហស្បតិ៍ (២៥ កក្កដា) បានលើកឡើងពីការបំផ្លិចបំផ្លាញសត្រូវរបស់អាមេរិក គឺប្រទេសអ៊ីរ៉ង់ នៅក្នុងការបង្ហោះតាមប្រព័ន្ធផ្សព្វផ្សាយសង្គម ដោយរំលឹកពីការផ្ទុះកំហឹងដ៏ខ្លាំងបំផុតរបស់លោកពេលនៅកាន់តំណែងក្នុងសេតវិមាន។

លោក Trump បានសរសេរនៅលើវេទិកាប្រព័ន្ធផ្សព្វផ្សាយសង្គម ទ្រូស សូសល (Truth Social) របស់ខ្លួនថា៖ ប្រសិនបើពួកគេពិតជាធ្វើ «ធ្វើឃាតប្រធានាធិបតី Trump» មែន ខ្ញុំសង្ឃឹមថាអាមេរិកកម្ចាត់អ៊ីរ៉ង់ ដោយលុបប្រទេសនេះចេញពីមុខមាត់ផែនដី។ ប្រសិនបើរឿងនេះមិនកើតឡើងទេ បណ្ដាមេដឹកនាំអាមេរិកនឹងត្រូវចាត់ទុកថាជា «មនុស្សកំសាក»។

លោក Trump បានលើកឡើងបែបនេះ រួមជាមួយនឹងវីដេអូខ្លីមួយរបស់នាយករដ្ឋមន្រ្តីអ៊ីស្រាអែល លោក Benjamin Netanyahu ដោយបង្ហាញពីការចោទប្រកាន់លើគម្រោងនានារបស់អ៊ីរ៉ង់ ប្រឆាំងនឹងលោក Trump នៅក្នុងសុន្ទរកថារបស់ខ្លួនទៅកាន់សភាអាមេរិក កាលពីថ្ងៃពុធ។ អ៊ីរ៉ង់ បានច្រានចោលការលើកឡើងនានាទាក់ទងនឹងការចោទប្រកាន់បែបនោះ។

សារព័ត៌មាន CNN បានរាយការណ៍ថា អាជ្ញាធរអាមេរិក បានទទួលការស៊ើបការណ៍សម្ងាត់ពី «ប្រភពផ្ទាល់មាត់» លើផែនការរបស់ទីក្រុងតេអេរ៉ង់ ផ្តោតលើអតីតប្រធានាធិបតីរូបនេះ ដែលជំរុញឱ្យមានការបង្កើនសន្តិសុខសម្រាប់លោក Trump ។ សារព័ត៌មានផ្សេងទៀតរបស់អាមេរិក ក៏បានរាយការណ៍ពីផែនការនេះផងដែរ ប៉ុន្តែបាននិយាយថាវាមិនជាប់ពាក់ព័ន្ធនឹងការបាញ់ប្រហារក្នុងយុទ្ធនាការនៅទីក្រុង បាត់ល័រ (Butler) រដ្ឋ ផិនស៊ីលវេនៀ (Pennsylvania) នោះទេ៕