មេដឹកនាំក្រុមហ៊ួទីនៅប្រទេសយេម៉ែន លោក អាប់ឌុល ម៉ាលីក អាល់ហ៊ួទី (Abdul Malik al-Houthi )កាលពីថ្ងៃព្រហស្បតិ៍ បាននិយាយនៅក្នុងសុន្ទរកថា តាមទូរទស្សន៍ថា ក្រុមប្រដាប់អាវុធរបស់ខ្លួន នឹងបើកការវាយប្រហារបន្ថែមទៀតប្រឆាំងនឹងទីក្រុងតែលអាវីវ ( Tel Aviv) របស់អ៊ីស្រាអែល។

មេដឹកនាំហ៊ួទីរូបនេះ បាននិយាយនៅក្នុងសុន្ទរកថាប្រចាំសប្តាហ៍របស់ខ្លួនដែលចាក់ផ្សាយដោយទូរទស្សន៍ al-Masirahរបស់ក្រុមខ្លួនថា៖«ខ្ញុំបញ្ជាក់ថា ប្រតិបត្តិការយោធាបន្ថែមទៀត ដើម្បីកំណត់គោលដៅទីក្រុងតែលអាវីវ នឹងកើតឡើង»។

កាលពីសប្តាហ៍មុន ក្រុមហ៊ួទី បានអះអាងទទួលខុសត្រូវចំពោះការវាយប្រហារដោយយានដ្រូនទៅលើអគារមួយ ក្នុងទីក្រុងតែលអាវីវ ដែលបានបណ្តាលឲ្យមនុស្សម្នាក់ស្លាប់ និង១០នាក់ផ្សេងទៀត រងរបួស។

យោងតាមទូរទស្សន៍ al-Masirah TV ជាការសងសឹកនឹងការវាយប្រហារនោះ យន្តហោះចម្បាំងអ៊ីស្រា អែល បានទម្លាក់គ្រាប់បែកលើកន្លែងស្តុកប្រេងមួយចំនួន នៅក្នុងទីក្រុងកំពង់ផែសមុទ្រក្រហម Hodeidah របស់ប្រទេសយេម៉ែន ដែលស្ថិតក្រោមការគ្រប់គ្រងរបស់ក្រុមហ៊ួទី ដោយបានសម្លាប់មនុស្ស ៦នាក់ និង ៨៣នាក់ទៀត រងរបួស។

ចាប់តាំងពីខែវិច្ឆិកា ឆ្នាំមុន ក្រុមហ៊ួទី បាននិងកំពុងកំណត់គោលដៅលើនាវាដែលមានទំនាក់ទំនងជាមួយប្រទេសអ៊ីស្រាអែល នៅសមុទ្រក្រហមនិងឈូងសមុទ្រ Aden ដោយប្រើមីស៊ីលបាលីស្ទីក និងយាន ដ្រូនផ្ទុកដោយគ្រាប់បែក ដើម្បីបង្ហាញពីសាមគ្គីភាពជាមួយប៉ាឡេស្ទីន នៅក្នុងតំបន់ហ្កាហ្សាស្ទី្រប។