លោក ម៉ាខ្មូត អាល់ហាបបាស (Mahmoud al-Habbash) ទីប្រឹក្សាប្រធានអាជ្ញាធរប៉ាឡេស្ទីន លោក ម៉ាខ្មូត អាបាស (Mahmoud Abbas) បាននិយាយថា រដ្ឋាភិបាលប៉ាឡេស្ទីន នឹងបដិសេធរាល់គំនិតផ្តួច ផ្តើមដែលបង្កប់ន័យបំបែកតំបន់វេសបែង( West Bank) ចេញពីតំបន់ហ្កាហ្សាស្ទ្រីប។

ទូរទស្សន៍ Al-Qahira Al-Ekhbariya បានដកស្រង់សម្តីលោកថា៖«ប៉ាឡេស្ទីន នឹងមិនទទួលយកស្ថានភាពមួយ ដែលតំបន់វេសបែង ត្រូវបានបំបែកចេញពីតំបន់ហ្កាហ្សាស្ទ្រីបនោះទេ»។

លោក អាល់ហាបបាស បានបន្ថែមថា រដ្ឋាភិបាលប៉ាឡេស្ទីន ដែលមានទីស្នាក់ការកណ្តាលនៅទីក្រុងរ៉ាម៉ាឡាភាគខាងលិច «នឹងមិនយល់ព្រមចំពោះសេណារីយោដែល ដាក់តំបន់ហ្កាហ្សា នៅខាងក្រៅដែនសមត្ថកិច្ចនៃស័្វយភាពរបស់ប៉ាឡេស្ទីនឡើយ»។

លោក អាល់ហាបបាស បានបញ្ជាក់ថា រដ្ឋាភិបាលរបស់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ «មិនចង់ឲ្យប៉ាឡេស្ទីន មានសិទ្ធិអំណាចពិតប្រាកដ លើទឹកដីរបស់ពួកគេទេ» ហើយ

កំពុងធ្វើការយ៉ាងខ្ជាប់ខ្ជួន ដើម្បីលុបបំបាត់ស្វ័យភាពរបស់ប៉ាឡេស្ទីន នៅតំបន់វេសបែង តាមរយៈគោលនយោបាយបង្កើតកន្លែងតាំងទីលំនៅរបស់ជនជាតិជ្វីហ្វ ឲ្យកាន់តែច្រើន នៅក្នុងតំបន់នេះ»។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ានៅថ្ងៃទី៧ ខែតុលា ឆ្នាំ ២០២៣ នៅពេលដែលក្រុម សកម្មប្រយុទ្ធមកពីចលនាបដិវត្តន៍ប៉ាឡេស្ទីនហាម៉ាស ដែលមានមូលដ្ឋាននៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នករស់នៅតាមព្រំដែនអ៊ីស្រាអែល និងចាប់ចំណាប់ថ្នូរជាង ២៤០នាក់ ក្នុងនោះមានស្រ្តី កុមារ និងមនុស្សចាស់។