ក្រសួងការពារជាតិរបស់ប្រទេសនេះ បាននិយាយកាលពីថ្ងៃព្រហស្បតិ៍ថា ប្រទេសទួរគី នឹងបញ្ជូននាវាកងទ័ពជើងទឹកចំនួនពីរគ្រឿង និងយន្តហោះចម្បាំង F-16 ចំនួន ៦គ្រឿង ទៅកាន់ប្រទេសកាតា ដែលជាផ្នែកនៃកិច្ចសហប្រតិបត្តិការយោធារវាងប្រទេសទាំងពីរ។

លោក Zeki Akturk ទីប្រឹក្សានៃក្រសួងព័ត៌មាន និងទំនាក់ទំនងសាធារណៈ បានថ្លែងនៅក្នុងសន្និសីទសារព័ត៌មានមួយថា ប្រទេសទួរគី នឹងបញ្ជូនគ្រឿងយុទ្ធោបករណ៍ ទៅកាន់ប្រទេសកាតា «ដើម្បីធានាថា ការហ្វឹកហ្វឺន និងសមយុទ្ធ ដែលធ្វើឡើងដោយកងកម្លាំងជើងគោក និងការចែករំលែកចំណេះដឹង បទពិសោធ និងសមត្ថភាពរួម ក៏ត្រូវបានធ្វើឡើង ដោយកងទ័ពជើងទឹក និងអាកាសផងដែរ។

លោក Akturk បាននិយាយថា នាវាល្បាត Tuzla ចំនួនពីរគ្រឿង ដែលនឹងបម្រើការក្រោមទីបញ្ជាការកងទ័ពជើងទឹក នឹងចាកចេញពីប្រទេសទួរគី នៅថ្ងៃទី ២៦ ខែកក្កដានេះ។

លោកបានបន្ថែមថា៖«យន្តហោះចម្បាំង F-16 ចំនួន ៦គ្រឿង នឹងទៅដល់ប្រទេសកាតា នៅថ្ងៃទី ៣០ ខែកក្កដា សម្រាប់ទីបញ្ជាការកងទ័ពអាកាស»។

ប្រទេសទួរគី បានបង្កើតមូលដ្ឋានយោធា នៅក្នុងប្រទេសកាតា ហើយប្រទេសទាំងពីរ បានរក្សាទំនាក់ទំនងជិតស្និទ្ធ ក្នុងរយៈពេលប៉ុន្មានឆ្នាំកន្លងទៅ។