រដ្ឋមន្ត្រីក្រសួងការពារជាតិ លោក Lloyd Austin កាលពីថ្ងៃព្រហស្បតិ៍ថា បានសន្យាធានាថា មន្ទីរបញ្ចកោណ នៅតែ «រឹងមាំ» និង «ផ្តោត»ការយកចិត្តទុកដាក់ ខណៈដែលលោកប្រធានាធិបតី ចូ បៃដិន បានចាកចេញពីការប្រជែងតំណែងប្រធានាធិបតី ចំពេលមានបញ្ហាប្រឈមផ្នែកសន្តិសុខជាច្រើន រួមទាំងការគំរាមកំហែងពីកូរ៉េខាងជើង សង្គ្រាមនៅអ៊ុយក្រែន និងអស្ថិរភាពនៅមជ្ឈិមបូព៌ា។

លោក Austin បានសន្យា ដោយចាត់ទុកឥណ្ឌូ-ប៉ាស៊ីហ្វិក ជាតំបន់ប្រតិបត្តិការដ៏សំខាន់របស់សហរដ្ឋ   អាមេរិក នៅក្នុងការបង្ហាញជាក់ស្តែងនៃការប្តេជ្ញាចិត្តផ្នែកសន្តិសុខរបស់រដ្ឋបាលលោក បៃដិន ចំពោះ    សម្ព័ន្ធមិត្តនិងដៃគូក្នុងតំបន់ រួមទាំងកូរ៉េខាងត្បូង និងជប៉ុនផងដែរ។

លោក និងប្រធានអគ្គសេនាធិការចម្រុះ លោកឧត្តមសេនីយ៍ Charles Q. Brown Jr. បាននិយាយនៅក្នុងសន្និសីទសារព័ត៌មាន ខណៈដែលលោក Austin គ្រោងនឹងធ្វើដំណើរទៅកាន់ប្រទេសជប៉ុន ដើម្បីចូលរួមកិច្ចប្រជុំថ្នាក់រដ្ឋមន្ត្រីការបរទេស និងការពារជាតិទ្វេភាគី នៅទីក្រុងតូក្យូ នៅថ្ងៃអាទិត្យ ដើម្បីពិភាក្សាអំពីកិច្ចសហប្រតិបត្តិការសន្តិសុខ និងបញ្ហាផ្សេងៗទៀត។

លោក Austin បានប្រាប់អ្នកយកព័ត៌មានថា៖«ឥឡូវនេះ លោកប្រធានាធិបតី កំពុងផ្តោតយ៉ាងខ្លាំងលើការងារនៅចំពោះមុខ ជាពិសេសក្នុងការបញ្ចប់សង្គ្រាមនៅតំបន់ហ្កាហ្សា ដោយពង្រឹងសមត្ថភាពរបស់អ៊ុយក្រែនសម្រាប់រយៈពេលដ៏យូរ និងធ្វើឲ្យជំហររបស់យើង នៅឥណ្ឌូ-ប៉ាស៊ីហ្វិក កាន់តែរឹងមាំ» ។ «ក្រសួងការពារជាតិ នឹងបន្តធ្វើនូវអ្វីដែលយើងតែងតែធ្វើ គឺរក្សាភាពរឹងមាំ និងបន្តការផ្តោតការយកចិត្តទុកដាក់»។