មេដឹកនាំគណបក្សប្រឆាំងដ៏ធំរបស់ប្រទេសថៃ សង្ឃឹមថា គណបក្សបោះជំហានទៅមុខ (Move Forward) របស់លោក នឹងរួចផុតពីសំណុំរឿងរំលាយគណបក្ស នាពេលខាងមុខ ប៉ុន្តែបានព្រមានពីផលប៉ះពាល់នៃការស៊ើបអង្កេតមួយផ្សេងទៀត ដែលអាចធ្វើឲ្យក្រុមដ៏មានប្រជាប្រិយភាពមួយនេះត្រូវបែកខ្ញែក។

លោក Pita Limjaroenrat (ភីថា លឹមចារ៉ឺនរ៉ាត់) ដែលបានដឹកនាំគណបក្សនេះឲ្យទទួលបានជ័យជម្នះ ក្នុងការបោះឆ្នោត កាលពីឆ្នាំមុន ប៉ុន្តែត្រូវបានរារាំងមិនឲ្យបានឡើងកាន់អំណាច ដោយសមាជិកសភាដែលតែងតាំងដោយពួកកងទ័ព បាននិយាយថា ការបង្កើតគណបក្សអភិរក្សនិយមរបស់ប្រទេសថៃជាថ្មីម្តងទៀត បង្ហាញឲ្យឃើញនូវឥទ្ធិពល ក្នុងការរារាំងបណ្ដាមេដឹកនាំដ៏មានប្រជាប្រិយភាព។

អំឡុងបទសម្ភាសន៍ជាមួយសារព័ត៌មាន Reuters នៅឯការិយាល័យសភា លោក ភីថា បាននិយាយថា៖ «នេះគឺជាដំណើរវិលចុះឡើងដ៏អាក្រក់ទី៥ ក្នុងរយៈពេល ២០ឆ្នាំ។ វាជាវិធីមួយដែលក្រុមឥស្សរជនអភិរក្សនិយម បានរកឃើញ ដើម្បីទប់ស្កាត់មន្រ្តីជាប់ឆ្នោតមិនឲ្យចូលកាន់អំណាច។ វាស្ទើរតែដូចនឹងនឹងបទចម្រៀងចាស់ដែលត្រូវបានដដែលៗម្តងហើយម្តងទៀត»។

គួរបញ្ជាក់ថា នយោបាយថៃត្រូវបានកំណត់ដោយការតស៊ូគ្នាឥតឈប់ឈរ រយៈពេលទសវត្សរ៍ រវាងស្ថាប័នរាជានិយម-អភិរក្សនិយម ដែលគាំទ្រដោយយោធា និងបណ្ដាគណបក្សនយោបាយដ៏មានប្រជាប្រិយភាព ក្នុងនោះរួមទាំងគណបក្សបោះជំហានទៅមុខផងដែរ។ 

កាលពីខែមករា តុលាការធម្មនុញ្ញបានសម្រេចថា ផែនការរបស់គណបក្សបោះជំហានទៅមុខ ក្នុងការចង់ឲ្យធ្វើវិសោធនកម្មច្បាប់ប្រឆាំងនឹងការប្រមាថព្រះមហាក្សត្រ ដែលជាច្បាប់ការពាររបបរាជាធិបតេយ្យមិនឲ្យមានការរិះគន់ គឺជាកិច្ចខិតខំប្រឹងប្រែងលាក់មុខ ដើម្បីធ្វើឲ្យខូចដល់រាជសម្បត្តិ ហើយបានបញ្ជាឲ្យបញ្ឈប់យុទ្ធនាការរបស់ខ្លួន។

ឥឡូវនេះ គណបក្សនេះប្រឈមនឹងការរំលាយចោល នាពេលខាងមុខ ដោយតុលាការដូចគ្នា ជុំវិញបញ្ហាដូចគ្នា នៅក្នុងសំណុំរឿងដែលត្រូវបានលើកយកមកដោយគណៈកម្មាធិការរៀបចំការបោះឆ្នោត ដោយការប្រកាសសាលក្រម គ្រោងនឹងធ្វើឡើងនៅថ្ងៃទី៧ ខែសីហា។ គណបក្សបោះជំហានទៅមុខ បដិសេធការប្រព្រឹត្តខុសណាមួយ៕