រដ្ឋមន្ត្រីការបរទេសចិន លោក Wang Yi បាននិយាយថា ប្រទេសចិន និងរុស្ស៊ី គួរតែបន្តរក្សាទំនាក់ទំនង និងការសម្របសម្រួលលើកិច្ចសហប្រតិបត្តិការអាស៊ីបូព៌ា ដើម្បីលើកកម្ពស់សន្តិភាព និងស្ថិរភាព ក្នុងតំបន់ ចំពេលមានភាពចលាចលអន្តរជាតិ។

ការលើកឡើងបែបនេះរបស់លោក Wang បានកើតមានឡើងក្នុងពេលលោកជួបជាមួយរដ្ឋមន្ត្រីក្រសួងការបរទេសរុស្ស៊ីលោក Sergei Lavrov អំឡុងកិច្ចប្រជុំកំពូលអាស៊ាន នៅប្រទេសឡាវ កាលពីថ្ងៃព្រហស្បតិ៍ (ទី២៥ ខែកក្កដា) ជាកន្លែងដែលលោកក៏បានជួបក្រៅផ្លូវការជាមួយរដ្ឋមន្ត្រីការបរទេសឥណ្ឌាផងដែរ ដោយការជំនួបនោះ ត្រូវបានធ្វើឡើង ក្នុងគោលបំណងបន្ធូរបន្ថយភាពតានតឹង ជុំវិញជម្លោះព្រំដែនដ៏រ៉ាំរ៉ៃ។

បើយោងតាមសេចក្តីថ្លែងការណ៍ពីក្រសួងការបរទេសរបស់ប្រទេសចិន នៅថ្ងៃសុក្រ (ទី២៦ ខែកក្កដា) នេះ បានឲ្យដឹងថា ក្នុងជំនួបជាមួយលោក Lavrov នោះ លោក Wang បាននិយាយថា នៅចំពោះមុខស្ថានការណ៍អន្តរជាតិដ៏ចលាចល ព្រមទាំងការជ្រៀតជ្រែក និងការប្រឆាំងពីខាងក្រៅ «ប្រទេសចិនបានត្រៀមរួចជាស្រេច ក្នុងការធ្វើការជាមួយប្រទេសរុស្ស៊ី ដើម្បីគាំទ្រយ៉ាងម៉ឺងម៉ាត់ និងការពារផលប្រយោជន៍ស្នូលរបស់គ្នាទៅវិញទៅមក»។

សេចក្ដីថ្លែងការណ៍នោះ បានបន្ថែមថា លោក Lavrov បាននិយាយថា៖ «រុស្ស៊ីនឹងធ្វើការជាមួយប្រទេសចិន ដើម្បីគាំទ្រដល់ភាពសំខាន់របស់អាស៊ាន និងការពារអំពើវិឆ្ឆេទកម្ម និងការជ្រៀតជ្រែកដោយកងកម្លាំងបរទេស»។

សម្រាប់លោក Wang រដ្ឋមន្ត្រីការបរទេសរូបនេះក៏ត្រូវបានគេរំពឹងផងដែរថា នឹងជួបជាមួយរដ្ឋមន្ត្រីក្រសួងការបរទេសជប៉ុន លោកស្រី Yoko Kamikawa នៅថ្ងៃសុក្រនេះ។ ហើយលោកគ្រោងនឹងចូលរួមកិច្ចប្រជុំអាស៊ានជាច្រើនរហូតដល់ថ្ងៃសៅរ៍៕