អាជ្ញាធរប្រទេសជប៉ុន កំពុងជំរុញឲ្យប្រជាជន មានវិធានការដើម្បីការពារជំងឺសុរិយរោគ ខណៈ កម្ដៅក្តៅខ្លាំង ត្រូវបានគេរំពឹងទុកជាថ្មីម្ដងទៀតនៅទូទាំងតំបន់ដ៏ធំទូលាយជាច្រើនក្នុងប្រទេសជប៉ុន នៅថ្ងៃសុក្រនេះ។

ទីភ្នាក់ងារឧតុនិយម និយាយថា សីតុណ្ហភាពហក់ឡើងខ្ពស់ បានបន្តអស់រយៈពេលជាច្រើនថ្ងៃ នៅក្នុងតំបន់ Kanto-Koshin ហើយកាលពីថ្ងៃព្រហស្បតិ៍ ក្រុង Kiryu ក្នុងខេត្ត Gunma បានកត់ត្រាកម្រិតកម្តៅដ៏គ្រោះថ្នាក់ ៣៨,៣ អង្សាសេ។

ទីភ្នាក់ងារ កំពុងព្យាករណ៍ពីកម្តៅខ្លាំងជាថ្មីម្តងទៀតនៅក្នុងតំបន់មួយចំនួននៅថ្ងៃសុក្រនេះ ដោយសារប្រព័ន្ធសម្ពាធខ្ពស់។ កម្រិតខ្ពស់នៅពេលថ្ងៃ ត្រូវបានគេរំពឹងថាហក់ឡើងដល់៣៧អង្សាសេនៅទីក្រុង Maebashi និងទីក្រុង Kumagaya ហើយ៣៦ អង្សាសេនៅទីក្រុង Mito ។

សារធាតុបារត អាចកើនឡើងដល់៣៥អង្សាសេនៅទីក្រុងតូក្យូភាគកណ្តាល ទីក្រុងយូកូហាម៉ា និងទីក្រុងកូហ្វូ និង៣១អង្សាសេនៅទីក្រុងនីហ្គាតា។

ទីភ្នាក់ងារឧតុនិយម និងក្រសួងបរិស្ថាន បានចេញការព្រមានអំពីជំងឺសុរិយរោគសម្រាប់ខេត្ត Ibaraki កោះ Izu និងខេត្ត Chiba។ មនុស្សជាច្រើនត្រូវបានគេបញ្ជូនទៅកាន់មន្ទីរពេទ្យ ក្នុងប៉ុន្មានថ្ងៃថ្មីៗនេះដោយមានរោគសញ្ញាជាក់ស្តែងនៃជំងឺសុរិយរោគ។

ប្រជាជន ត្រូវបានគេក្រើនរំលឹកកុំឲ្យហាត់ប្រាណ និងចៀសវាងចេញទៅខាងក្រៅ តាមដែលអាចធ្វើទៅបាន។ ពួកគេត្រូវបានណែនាំឱ្យប្រើប្រាស់ម៉ាស៊ីនត្រជាក់នៅក្នុងលំនៅឋាន និងទទួលទានជាតិទឹក និងអំបិលឱ្យបានគ្រប់គ្រាន់។ ប្រជាជន ក៏ត្រូវបានស្នើឱ្យយកចិត្តទុកដាក់លើមនុស្សចាស់ និងទារកផងដែរ ព្រោះពួកគេងាយរងគ្រោះដោយជំងឺសុរិយរោគ។