សាលាឧទ្ធរណ៍នៅថ្ងៃសុក្រនេះ បានកាត់បន្ថយទោសជាប់ពន្ធនាគារមកត្រឹម ១០ឆ្នាំ សម្រាប់អ្នកបើករថយន្តបុកហើយរត់ ដែលត្រូវបានចោទប្រកាន់ថា បានបុកចិញ្ចើមផ្លូវ ក្រោមឥទ្ធិពលនៃគ្រឿងញៀន និងបានបុកអ្នកធ្វើដំណើរម្នាក់ស្លាប់ ហើយរត់គេចខ្លួនបាត់ពីសង្កាត់ Apgujeong ដ៏ស្រស់ស្អាត កាលពីឆ្នាំមុន។

បុរសអាយុ ២៨ឆ្នាំ ដែលត្រូវបានស្គាល់អត្តសញ្ញាណដោយនាមត្រកូល Shin ត្រូវបានចោទប្រកាន់ពីបទបានបើករថយន្ត Rolls-Royce របស់ខ្លួននៅលើផ្លូវក្បែរស្ថានីយ Apgujeong ភាគខាងត្បូងទីក្រុងសេអ៊ូល ហើយបានបុកស្ត្រីម្នាក់ ដែលមានអាយុ ២០ឆ្នាំ កាលពីថ្ងៃទី ២ ខែសីហា បន្ទាប់មកបុរសនោះ បានរត់គេចខ្លួនបាត់ ដោយពុំបានដោះស្រាយ ក្រោយពេលកើតហេតុ។

ជនរងគ្រោះ មានអាយុ២៧ឆ្នាំ នៅពេលនោះ ត្រូវបានគេប្រកាសថា ខូចខួរក្បាល ហើយបានស្លាប់ប្រហែល៤ខែក្រោយមក។

កាលពីខែមករា តុលាការសង្កាត់នេះ បានកាត់ទោសឲ្យជាប់ពន្ធនាគាររយៈពេល ២០ឆ្នាំ សម្រាប់លោក Shin ប៉ុន្តែសាលាឧទ្ធរណ៍ បានកាត់បន្ថយទោសពាក់កណ្តាល ដោយនិយាយថា ចេតនារបស់ចុងចោទក្នុងការរត់ចេញពីកន្លែងកើតហេតុ មិនត្រូវបានបញ្ជាក់ច្បាស់លាស់នោះទេ។

តុលាការនេះ បាននិយាយថា ចុងចោទទំនងជាបានចាកចេញពីកន្លែងកើតហេតុជាបណ្តោះអាសន្ន ដើម្បីស្វែងរកទូរស័ព្ទរបស់គាត់ បន្ទាប់ពីភ្លេចថា វានៅក្នុងរថយន្តរបស់គាត់ ដោយសារតែឥទ្ធិពលនៃគ្រឿង  ញៀននោះ។