គណៈកម្មាធិការស៊ើបអង្កេតរបស់រុស្ស៊ី នៅថ្ងៃសុក្រនេះ បានចេញផ្សាយវីដេអូមួយ បង្ហាញពីបុរសម្នាក់ ដែលត្រូវបានគេស្គាល់ថា Yevgeny Serebryakov ត្រូវបាននាំខ្លួនសម្រាប់ការសួរចម្លើយដោយបុគ្គលិកសន្តិសុខពាក់ម៉ាស់។

លោក Serebraykov ត្រូវបានគេសង្ស័យក្នុងការផលិត និងដាក់គ្រាប់បែកក្នុងរថយន្ត ដែលបានធ្វើឲ្យរងរបួសមនុស្សម្នាក់ ខណៈសារព័ត៌មានរុស្ស៊ីមួយចំនួនអះអាងថា ជាមន្ត្រីម្នាក់មកពីទីភ្នាក់ងារស៊ើបការណ៍យោធារុស្ស៊ីនៅភាគខាងជើងទីក្រុងមូស្គូ។ ប្រព័ន្ធផ្សព្វផ្សាយផ្សេងទៀតបាននិយាយថា បុរសដែលរងរបួសគឺជាមន្ត្រីយោធាធម្មតា។ បច្ចុប្បន្នស្ថានភាពរបស់លោក ត្រូវបានចាត់ទុកថា មានស្ថេរភាពប៉ុន្តែនៅធ្ងន់ធ្ងរនៅឡើយ។

យោងតាមក្រុមអ្នកស៊ើបអង្កេតបានឲ្យដឹងថា លោក Serebryakov បានសារភាពថា លោកបានធ្វើសកម្មភាពតាមការបញ្ជារបស់អង្គភាពសេវាសន្តិសុខអ៊ុយក្រែន (SBU)។ 

ក្រសួងមហាផ្ទៃរុស្ស៊ី បាននិយាយថា មនុស្សពីរនាក់បានរងរបួសក្នុងការបំផ្ទុះនេះ ហើយករណីព្រហ្មទណ្ឌត្រូវបានបើកដំណើរការ។ 

អាជ្ញាធរប្រទេសទួរគី បាននិយាយថា ពួកគេបានចាប់ខ្លួនពលរដ្ឋរុស្ស៊ីម្នាក់ ដែលសង្ស័យពីការវាយប្រហារនៅទីក្រុង Bodrum បន្ទាប់ពីបុរសរូបនេះ បានជិះយន្តហោះចូលមក ពីទីក្រុងមូស្គូ។ 

នៅថ្ងៃសុក្រនេះ អង្គភាពសេវាសន្តិសុខ FSB របស់រុស្ស៊ី បាននិយាយនៅក្នុងសេចក្តីថ្លែងការណ៍ថា បុរសដែលខ្លួនហៅឈ្មោះថា Yevgeny Serebryakov ត្រូវបាននាំមកប្រទេសរុស្ស៊ី ពីប្រទេសទួរគី ហើយបានប្រគល់ទៅឱ្យ ក្រុមអ្នកស៊ើបអង្កេត។