មន្ត្រីអ៊ីស្រាអែលមួយចំនួន បានរិះគន់អនុប្រធានាធិបតីអាមេរិក លោកស្រី Kamala Harris ដែលត្រូវបានសន្មត់ជាបេក្ខជនតំណែងប្រធានាធិបតីរបស់គណបក្សប្រជាធិបតេយ្យ ពាក់ព័ន្ធនឹងការអំពាវនាវឲ្យបញ្ចប់សង្គ្រាម នៅតំបន់ហ្កាហ្សា ដោយសារតែមើលឃើញពីក្ដីឈឺចាប់ដែលកំពុងបន្តមាន។ 

គួរបញ្ជាក់ថា បន្ទាប់ពីជួបជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu លោកស្រី Harris បានជំរុញឲ្យមានកិច្ចព្រមព្រៀងជាមួយក្រុមហាម៉ាស ដោយលើកឡើងពីវឌ្ឍនភាពប្រកបដោយក្តីសង្ឃឹមនៅក្នុងកិច្ចចរចា។ តែទោះបីជាយ៉ាងណាក្ដី លោក Netanyahu បានអំពាវនាវឲ្យមានជំនួយយោធាបន្ថែមទៀតរបស់សហរដ្ឋអាមេរិក ដោយអះអាងថា វានឹងស្តារសន្តិភាព និងធានាការដោះលែងចំណាប់ថ្នូរ។

ដោយនិយាយក្នុងលក្ខខណ្ឌមិនបញ្ចេញឈ្មោះ មន្ត្រីអ៊ីស្រាអែលបានសម្តែងការព្រួយបារម្ភថា ការលើកឡើងរបស់លោកស្រី Harris អាចជាសញ្ញានៃការបែកបាក់ រវាងសហរដ្ឋអាមេរិក និងអ៊ីស្រាអែល ដែលអាចនាំឲ្យមានការពន្យារពេលកិច្ចព្រមព្រៀងមួយ។ មិនមែនលោកស្រី Harris តែម្នាក់ឯង ដែលអំពាវនាវឲ្យបញ្ចប់សង្រ្គាមនោះទេ តែទាំងប្រធានាធិបតីលោក Joe Biden និងអតីតប្រធានាធិបតី លោក Donald Trump ក៏បានជំរុញឲ្យបញ្ឈប់ជម្លោះនេះយ៉ាងឆាប់រហ័សផងដែរ។

រដ្ឋមន្ត្រីហិរញ្ញវត្ថុអ៊ីស្រាអែល លោក Bezalel Smotrich និងរដ្ឋមន្ត្រីសន្តិសុខជាតិ លោក Itamar Ben-Gvir ដែលជាអ្នកគាំទ្រដ៏សំខាន់នៃរដ្ឋាភិបាលចម្រុះរបស់លោក Netanyahu បានថ្កោលទោសការលើកឡើងរបស់លោកស្រី Harris ដោយលោក Ben-Gvir បានទទូចថា អរិភាពនឹងនៅតែបន្ត។

លោកស្រី Harris បានសង្កត់ធ្ងន់លើតម្រូវការក្នុងការដោះស្រាយទុក្ខលំបាក និងនិយាយការពារសិទ្ធិការពារខ្លួនរបស់អ៊ីស្រាអែល តែក៏បានបង្ហាញពីការបាត់ភាពអត់ធ្មត់ ចំពោះរដ្ឋាភិបាលរបស់លោក Netanyahu ផងដែរ៕