យោងតាមស្ថាប័នរដ្ឋាភិបាលដែនដីប៉ាឡេស្ទីន បានឲ្យដឹងថា ពលរដ្ឋប៉ាឡេស្ទីន បានមកប្រមូលផ្តុំគ្នានៅទីក្រុង Aqqaba កាលពីថ្ងៃសុក្រ ដើម្បីថ្កោលទោសចំពោះមរណភាពរបស់មេដឹកនាំក្រុមហាម៉ាសម្នាក់នៅតំបន់ West Bank នៅក្នុងមន្ទីរឃុំឃាំងរបស់អ៊ីស្រាអែល។

លោក Mustafa Muhammad គណៈកម្មការកិច្ចការឃុំឃាំងរបស់ប៉ាឡេស្ទីន បាននិយាយនៅក្នុងសេចក្តីថ្លែងការណ៍ថា លោក Abu Ara បានស្លាប់ បន្ទាប់ពីស្ថានភាពសុខភាពរបស់លោកចុះខ្សោយខ្លាំង។ លោក Abu Ara អាយុ៦៣ ឆ្នាំ បានស្លាប់ បន្ទាប់ពីត្រូវបានបញ្ជូនទៅកាន់មន្ទីរពេទ្យ ពីពន្ធនាគារ Ramon នៅភាគខាងត្បូងប្រទេសអ៊ីស្រាអែល។ ទីក្រុង Aqqaba គឺជាស្រុកកំណើតរបស់លោក។

មន្ត្រីប៉ាឡេស្ទីន បាននិយាយថា លោក Abu Ara ត្រូវបានចាប់ខ្លួនកាលពីខែតុលាឆ្នាំមុន ត្រូវបានទទួលរងការធ្វើទារុណកម្ម និងមិនឲ្យមានការព្យាបាលវេជ្ជសាស្ត្រ។ ពុំមានការអត្ថាធិប្បាយភ្លាមៗពីអ៊ីស្រាអែលនៅឡើយទេ។ សមាគមអ្នកទោសប៉ាឡេស្ទីន បាននិយាយកាលពីខែមុនថា យ៉ាងហោចណាស់មានពលរដ្ឋប៉ាឡេស្ទីន១៨នាក់ បានស្លាប់នៅក្នុងមន្ទីរឃុំឃាំងរបស់អ៊ីស្រាអែល ចាប់តាំងពីការចាប់ផ្តើម សង្គ្រាមនៅតំបន់ហ្កាហ្សា កាលពីថ្ងៃទី៧ ខែតុលា។

យោងតាមតួលេខសរុបរបស់អ៊ីស្រាអែលបានឲ្យដឹងថា ក្រុមអ្នកវាយប្រហារដឹកនាំដោយក្រុមហាម៉ាសបានសម្លាប់មនុស្សចំនួន ១.២០០ នាក់ និងចាប់មនុស្សជាង ២៥០ នាក់ជាចំណាប់ថ្នូរ ហើយរហូតមកដល់ពេលនេះ ចំណាប់ថ្នូរ១២០នាក់ នៅតែត្រូវបានឃុំខ្លួន ទោះបីជាអ៊ីស្រាអែលជឿថា មួយភាគបីនៃពួកគេ បានស្លាប់ក៏ដោយ។ 

អាជ្ញាធរសុខាភិបាលតំបន់ហ្កាហ្សា និយាយថា ពលរដ្ឋប៉ាឡេស្ទីន ជាង ៣៩.០០០នាក់ ត្រូវបានសម្លាប់ ហើយភាគច្រើននៃប្រជាជន២,៣លាននាក់នៅហ្កាហ្សា បានជម្លៀសខ្លួនចេញពីលំនៅឋាន ខណៈការប្រយុទ្ធគ្នា បានបំផ្លាញតំបន់ជុំវិញនោះជាច្រើន និងបានបង្កើតហន្តរាយមនុស្សធម៌ដ៏អាក្រក់បំផុត។