កីឡាអូឡាំពិករដូវក្តៅឆ្នាំ២០២៤ បើកជាផ្លូវការ នៅទីក្រុងប៉ារីស ក្នុងពេលសន្តិសុខត្រូវបានរឹតបន្តឹង បន្ទាប់ពីមានសកម្មភាពសង្ស័យជាច្រើន នៃការបំផ្លាញ ដែលបានដាក់គោលដៅលើបណ្តាញរថភ្លើងល្បឿនលឿននៅប្រទេសបារាំង។

ពិធីបើក កាលពីថ្ងៃសុក្រ គឺជាលើកដំបូងសម្រាប់ការប្រកួតកីឡារដូវក្តៅ ដែលធ្វើឡើងនៅខាងក្រៅពហុកីឡដ្ឋាន។ រដ្ឋធានីរបស់ប្រទេសបារាំង ធ្លាប់ធ្វើជាម្ចាស់ផ្ទះកីឡាអូឡាំពិក កាលពីឆ្នាំ ១៩០០ និងឆ្នាំ ១៩២៤។

អត្តពលិក បានដង្ហែរក្បួនតាមទូក ដែលធ្វើដំណើរតាមដងស្ទឹងសែន ក្នុងចម្ងាយប្រហែល៦ គីឡូម៉ែត្រ។

តារាល្បីរបស់សហរដ្ឋអាមេរិក Lady Gaga និងអ្នករាំមកពី ទីក្រុងប៉ារីស បានសម្តែង ខណៈក្បួនដង្ហែតាមទូក បានបន្ត។ 

ប្រធានគណៈកម្មាធិការកីឡាអូឡាំពិកអន្តរជាតិ លោក Thomas Bach ថ្លែងសុន្ទរកថានៅ Trocadero ក្បែរប៉មអេហ្វែល ។ លោកនិយាយថា តើមានកន្លែងណាដែលល្អជាងទីក្រុងប៉ារីស ដើម្បីចែករំលែកភាពអស្ចារ្យនៃកីឡាអូឡាំពិកនេះ ទៅកាន់ពិភពលោកទាំងមូល។

ប្រធានាធិបតីបារាំង លោក Emmanuel Macron បានប្រកាសជាផ្លូវការនៃបើកការប្រកួតកីឡាអូឡាំពិក។