ក្រុមមន្រ្តីប៉ាឡេស្ទីន និយាយថា មនុស្សយ៉ាងហោច ៣០នាក់ ត្រូវបានសម្លាប់នៅក្នុងការវាយ​ប្រហារ​តាម​ច្រកអាកាស​របស់អ៊ីស្រាអែល លើសាលារៀនធ្វើជាទីជម្រកសម្រាប់ជនប៉ាឡេស្ទីន​ជម្លៀសខ្លួន នៅតំបន់ហ្កាហ្សាស្រ្ទីប ។

អ៊ីស្រាអែល អះអាងថា ពួកគេបានវាយប្រហារលើគោលដៅក្រុមជីវពលដែលកំពុង​ប្រើប្រាស់​បរិវេន​មួយនេះ ។

 សារព័ត៌មានគ្រប់គ្រងដោយក្រុមហាម៉ាស់ រាយការណ៍ថា កុមារ ១៥នាក់ និងស្រ្តី ៨នាក់ ស្ថិត​នៅ​ក្នុងចំណោមអ្នកដែលត្រូវបានសម្លាប់នៅក្នុងការវាយប្រហារនៅទីក្រុងភាគកណ្តាល Deir Al-Balah ហើយមនុស្សជាង ១០០នាក់ផ្សេងទៀត បានរងរបួស ។

 រូបភាពវីដេអូឃ្លីបរបស់ទីភ្នាក់ងារព័ត៌មានរ៉យទ័រ ឃើញជនប៉ាឡេស្ទីន វិលត្រឡប់មកកាន់ទីតាំង​រងការ​ទម្លាក់គ្រាប់បែក ដើម្បីពិនិត្យមើលទ្រព្យសម្បត្តិរបស់ពួកគេ ។

 ជញ្ជាំងអគារ ត្រូវបានបំផ្ទុះ ហើយកម្ទេចកម្ទី បានរាយប៉ាយពាសពេញសួនសាលារៀន ។

 យោងតាមការអះអាងរបស់ក្រុមអាជ្ញាធរសុខភាពក្នុងស្រុក បានឲ្យដឹងថា ជនប៉ាឡេស្ទីនជាង ៣៩.០០០នាក់ ត្រូវបានសម្លាប់ អំឡុងការវាយប្រហាររបស់អ៊ីស្រាអែលនៅតំបន់ហ្កាហ្សា ៕