ទូរទស្សន៍រដ្ឋ CCTV រាយការណ៍ថា ប្រតិបត្តិការបោសសម្អាត បានចាប់ផ្តើម ក្រោយព្យុះទីហ្វុង Gaemi បោកបក់ឆ្លងកាត់បណ្តាខេត្តភាគខាងត្បូងប្រទេសចិន ស្របពេលដែល​ព្យុះមាន​កម្លាំង​ខ្លាំង​បំផុតវាយប្រហារប្រទេសចិនក្នុងឆ្នាំនេះ បោកបក់ឆ្ពោះទៅកាន់តំបន់ភាគកណ្តាល ។

រូបភាពវីដេអូឃ្លីបពីទូរទស្សន៍ CCTV ឃើញទឹកទន្លេឡើង ហើយចំណតរថយន្ត និងផ្ទះ​សម្បែង​ប្រជាពលរដ្ឋ រងការជន់លិចគ្មានសល់ ។

សារព័ត៌មានរដ្ឋចិន រាយការណ៍ថា នៅក្នុងខេត្ត Guangdong ប្រជាពលរដ្ឋជាង ៩ម៉ឺននាក់ ត្រូវបានជម្លៀសចេញ ដោយសារទឹកជំនន់ ។

ទោះបី​ជាព្យុះ Gaemi បានថមថយ​កម្លាំង​នៅ​ជា​ព្យុះត្រូពិក​ដោយសារ​ល្បឿនខ្យល់បក់ចុះខ្សោយ​យ៉ាង​ណាក្តី វានៅតែជាហានិភ័យ បង្កឲ្យកើតមានទឹកជំនន់ដដែល ជាពិសេសនៅតាមតំបន់​ភាគ​កណ្តាល​ប្រទេសចិន ដែលរងគ្រោះរួចទៅហើយដោយសារភ្លៀងរដូវក្តៅ ។

ក្រុមព្យាករណ៍ឧតុនិយម បានព្រមានថា ខេត្តចំនួន ១០ អាចនឹងរងផលប៉ះពាល់ដោយសារព្យុះ Gaemi រួមទាំងខេត្ត Henan ផងដែរ គឺជាខេត្តមានពលរដ្ឋរស់នៅជាង ១០០លាននាក់ ស្ថិតនៅភាគកណ្តាលប្រទេសចិន ៕