យោងតាមអនុសាសន៍របស់ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រី​ក្រសួង​មហាផ្ទៃ​ស្តីពីការពិនិត្យឡើងវិញនូវរាល់ឯកសារព្រមព្រៀងជាមួយក្រុមហ៊ុនផលិត លក់ ចែកចាយ និង​ទទួលផ្សព្វផ្សាយគ្រឿងស្រវឹងនៅតាមផ្លូវ និងទីសាធារណៈ ឯកឧត្តម ស៊ុន សុវណ្ណារិទ្ធិ អភិបាល​ខេត្ត​កំពង់ឆ្នាំង បានណែនាំដល់រដ្ឋបាលក្រុងស្រុកទាំង៨ក្នុងខេត្តកំពង់ឆ្នាំង ត្រូវរុះរើផ្ទាំង​ប៉ាណូនៅ​តាមដងផ្លូវ នៅកាត់ពីលើដងផ្លូវ និងនៅតាម​ទីសាធារណៈ​នានា​ស្ថិត​ក្នុង​ដែន​សមត្ថកិច្ច​របស់​ខ្លួនឱ្យអស់។

បើតាមរដ្ឋបាលខេត្តកំពង់ឆ្នាំង គិតត្រឹមថ្ងៃទី២៧ ខែកក្កដា ឆ្នាំ២០២៤នេះ ប៉ាណូធំៗ​របស់​ក្រុមហ៊ុន​ស្រាបៀរប្រ​មាណ៥០%បានទម្លាក់ចុះនៅក្នុងក្រុងកំពង់ឆ្នាំង នៅ៥០%ទៀតមិនទាន់​ទម្លាក់​នៅ​ឡើយ។

រដ្ឋបាលខេត្តបញ្ជាក់ថា ការបញ្ឈប់ការផ្សព្វផ្សាយគ្រឿង​ស្រវឹង​តាមរយៈ​ទម្លាក់​ប៉ាណូ​ស្រាបៀរ​តាម​ដងផ្លូវនេះ ក្នុងគោលបំណងកាត់បន្ថយការទទួលទានគ្រឿងស្រវឹងជ្រុលហួសហេតុ ដែលបង្ក​​គ្រោះ​ថ្នាក់​ដល់សុខភាព សង្គម ពិសេសគ្រោះថ្នាក់ចរាចរណ៍ ធ្វើអោយប៉ះពាល់ដល់កុមារផងដែរ ៕ កាំង ហុងវាស្នា