យោងតាមទិន្នន័យបឋមពីស្ថាប័ន អ៊ិនប៊ីស៊ី យូនីវើសល (NBCUniversal) របស់​សារជីវកម្ម​ផ្សព្វ​ផ្សាយ ខមខាស (Comcast) កាលពីថ្ងៃសៅរ៍ (២៧ កក្កដា) បានឱ្យដឹងថា ពិធីបើក​កីឡា​អូឡាំពិក​នៅ​ទីក្រុងប៉ារីស ប្រទេសបារាំង បានទាក់ទាញអ្នកទស្សនាចំនួន ២៨,៦លាន​នាក់​នៅ​សហរដ្ឋ​អាមេរិក ដោយក្រុមហ៊ុន​នេះ​បាន​និយាយ​ថា​ជា​ការ​ចាប់​ផ្តើម​កីឡា​រដូវក្តៅដែល​មាន​អ្នក​ទស្សនា​ច្រើន​បំផុតចាប់តាំងពីព្រឹត្តិការណ៍នៅទីក្រុងឡុងដ៍្រ ក្នុងឆ្នាំ២០១២មក។

ការប្រារព្ធពិធីកាលពីថ្ងៃសុក្រ មានការបង្ហាញអំពីគណៈប្រតិភូអត្តពលិកធ្វើដំណើរតាមទន្លេសែន (Seine) ឆ្លងកាត់ទីតាំងដ៏ល្បីល្បាញរបស់ទីក្រុងប៉ារីស និងការ​សម្តែង​ជា​សាធារណៈ​លើក​ដំបូង​របស់​តារា​ចម្រៀងដ៏ល្បី លោកស្រី សេលីន ឌីអន (Celine Dion) ក្នុងរយៈពេលជាច្រើនឆ្នាំ។

នេះគឺជាព្រឹត្តិការណ៍ចាក់ផ្សាយដ៏សំខាន់មួយសម្រាប់ស្ថាប័នផ្សព្វផ្សាយ NBCUniversal ដែល​បាន​ចំណាយប្រាក់ ៧,៦៥ ពាន់លាន​ដុល្លារ​ដើម្បី​ពង្រីក​សិទ្ធិ​របស់​ខ្លួន​ក្នុង​ការ​ចាក់​ផ្សាយ​ហ្គេម​អូឡាពិក​នេះ​នៅសហរដ្ឋអាមេរិក រហូតដល់ឆ្នាំ២០៣២។ កិច្ចព្រមព្រៀងស្តីពីសិទ្ធិប្រព័ន្ធផ្សព្វផ្សាយកីឡាអូឡាំពិករបស់ NBCUniversal គឺធំជាងគេនៅ​លើ​ពិភពលោក​។

តួរលេខអ្នក​មើល ដែលរួមមានទូរទស្សន៍ NBC និងសេវាចាក់ផ្សាយ ផីខុក (Peacock) គឺជា​ជោគជ័យ​យ៉ាងខ្លាំងសម្រាប់ប្រព័ន្ធផ្សព្វផ្សាយមួយនេះ បើធៀបនឹងអ្នកទស្សនាត្រឹមតែ ១៧លាន​នាក់​ប៉ុណ្ណោះ​សម្រាប់ព្រឹត្តិការណ៍កីឡាអូឡាំពិកទីក្រុងតូក្យូ ក្នុងឆ្នាំ២០២១។ ទាំងកីឡា​អូឡាំពិក​នៅ​ទីក្រុងតូក្យូ និងនៅទីក្រុងប៉េកាំងឆ្នាំ២០២២ មានឧបសគ្គតំបន់ពេលវេលា (ម៉ោង​ចាក់​ផ្សាយ​) ​ដ៏លំបាកសម្រាប់ទស្សនិកជនអាមេរិក ហើយត្រូវបានជះឥទ្ធិពលដោយជំងឺរាតត្បាតទៀតផង៕