កណ្តាល : ប្រជាពលរដ្ឋនៅភូមិព្រែកសំរោង៣សង្កាត់តាខ្មៅ ក្រុងតាខ្មៅ ខេត្តកណ្តាល បានទទួចស្នើសុំឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្តាលជួយអន្តរាគមន៍ដល់ភូមិគាត់ ក្រោយមានភ្លៀងម្តងៗបានធ្វើ ឲ្យផ្ទះសម្បែងរបស់ពួកគាត់មានការលិចលង់ជាអចិន្ត្រៃយ៍ ហើយអាជ្ញាធរមូលដ្ឋានមិនបានយកចិត្តទុកដាក់ជូនពួកគាត់បន្ទាប់ពីពួកគាត់បានស្នើសុំជាច្រើនលើកច្រើនសារហើយនោះ។

 ប្រជាពលរដ្ឋដែលរស់នៅភូមិខាងលើនេះ គឺមានជាង២០គ្រូសារ ហើយពួកគាត់បានរស់នៅជា មួយនឹងជំនន់ទឹកភ្លៀងនេះអស់រយៈពេលជាច្រើនឆ្នាំមកហើយ ដោយសម្ភារៈក្នុងផ្ទះនិងក្រោមផ្ទះរបស់ពួកគាត់បានលិចលង់ជាប្រចាំ និងផ្លូវធ្វើដំណើរពិបាក ខណៈពេលដែលភ្លៀងធ្លាក់ម្តងៗ ដោយសារតែប្រព័ន្ធលូរមានលក្ខណៈតូចទឹកហូរមិនទាន់ ហើយពេលលិចម្តងៗមានរយៈពេលយូរថែមទៀតផង។

 យ៉ាងណាក៏ដោយបងប្អូនប្រជាពលរដ្ឋនៅតំបន់នោះបានអះអាងថា ពួកគាត់ធ្លាប់បានប្តឹងទៅឯកឧត្តមអភិបាលខេត្តកណ្តាលជាច្រើនលើកហើយ ដោយឯកឧត្តមអភិបាលក៏បានចាត់មន្រ្តីខេត្តឲ្យចុះ ត្រួតពិនិត្យផងដែរ តែការចុះត្រួតពិនិត្យរបស់មន្រ្តីមិនបានដល់កន្លែងដែលពួកគាត់លិចនោះទេ ដោយបន្ត ទុកឲ្យផ្ទះរបស់ពួកគាត់លិចដដែល។ ដូច្នេះហើយពួកគាត់សូមស្នើយ៉ាងទទួចដល់ឯកឧត្តមអភិបាលខេត្ត មេត្តាជួយដោះស្រាយជូនពួកគាត់ ខណៈ ពួកគាត់ពិបាកធ្វើដំណើរ និងរស់នៅដោយសារតែទឹកលិចយូរ បានបង្ករជាស្អុយ និងក្រខ្វក់ជាដើមនោះ៕ អត្ថបទបាន :ចក