ប្រជាជននៅក្នុងតំបន់ ណស ដាហ្វឺ (North Darfur) នៃប្រទេសស៊ូដង់ កំពុងប្រឈមមុខ​នឹង​កង្វះ​ខាត​ស្បៀងអាហារ និងការផ្គត់ផ្គង់ផ្នែកវេជ្ជសាស្រ្តយ៉ាងធ្ងន់ធ្ងរ ខណៈការ​ប៉ះទង្គិចគ្នា​យ៉ាង​ខ្លាំង​ក្លា​ក្នុង​ខែឧសភា រវាងកងកម្លាំងប្រដាប់អាវុធស៊ូដង់ (SAF) និងកងកម្លាំងគាំទ្រ​រហ័ស​យោធា​ប៉ារ៉ា (RSF) បានផ្ទុះឡើងជាថ្មីនៅក្នុងទីក្រុង អ៊ែលហ្វាសឺ (El Fasher) រដ្ឋធានីនៃរដ្ឋ ណស ដាហ្វឺ។

យោងតាមក្រសួងសុខាភិបាលតំបន់ ណស ដាហ្វឺ បានឱ្យដឹងថា ការកើន​ឡើង​នៃ​ជម្លោះ​នា​ពេល​ថ្មីៗ​នេះនៅក្រុង អ៊ែលហ្វាសឺ បានបណ្តាលឱ្យជនស៊ីវិលប្រហែល ៧៥០នាក់ស្លាប់ និងជាង ៤.៧០០នាក់រងរបួស ហើយបច្ចុប្បន្នមនុស្ស ៨០០.០០០នាក់កំពុងជាប់នៅក្រុងនេះ។ យោងតាម​អង្គការសុខភាពពិភពលោក ជំនួយមនុស្សធម៌មិនអាចចូលទៅក្នុងទីក្រុងបានទេ ដែល​នាំ​ឱ្យ​មានការខ្វះខាតខ្លាំងនៃស្បៀងអាហារ ឱសថ និងការផ្គត់ផ្គង់ផ្សេងៗ។

ជម្លោះ​នៅ​ក្នុងតំបន់ ដាហ្វឺ បានជម្លៀសប្រជាជនជាង ៤លាននាក់ក្នុងឆ្នាំកន្លងមក។ ភាគច្រើន​នៃ​ជនភៀស​ខ្លួនទាំងនោះឥឡូវនេះកំពុងរស់នៅក្នុងជំរំជនភៀសខ្លួនក្នុងស្រុករាប់សិបកន្លែង ដែលស្ថានភាពមានការលំបាកខ្លាំង។

ប្រព័ន្ធថែទាំសុខភាពនៅក្រុង El Fasher ក៏ស្ថិតក្នុងដំណាក់កាលដួលរលំផងដែរ ដោយទីតាំងពេទ្យទាំងអស់បានឈប់ដំណើរការ លើកលែងតែមន្ទីរពេទ្យមួយ និងមណ្ឌលថែទាំសុខភាពបឋមចំនួនបួនប៉ុណ្ណោះ។ ការផ្ទុះឡើងនៃជំងឺឆ្លងដូចជាជំងឺអាសន្នរោគ និងជំងឺរាគ ក៏ចាប់ផ្តើមរីករាលដាលនៅក្នុងជំរំជនភៀសខ្លួនមួយចំនួនផងដែរ៕