ការវាយប្រហារដោយគ្រាប់រ៉ូកែតដ៏បង្ហូរឈាមនៅក្នុងតំបន់ខ្ពង់រាប ហ្កូឡាន់ (Golan Heights) ដែលកាន់កាប់ដោយអ៊ីស្រាអែល បានបន្ថែមការព្រួយបារម្ភថា អ៊ីស្រាអែល និងក្រុមហេសបូឡា នៅលីបង់ អាចនឹងក្លាយជាសង្រ្គាមពេញលេញ ដោយនោះជាអ្វីដែលភាគីទាំងពីរធ្លាប់បានបង្ហាញថាពួកគេចង់បញ្ចៀស ប៉ុន្តែក៏និយាយថាបានត្រៀមខ្លួនជាស្រេច។

មូលហេតុដែលនាំឱ្យភាពតានតឹងនេះកាន់តែឡើងកម្ដៅគឺចាក់ឬសគល់ជ្រៅជាយូរយារណាស់មកហើយ។ ក្រុមហេសបូឡា បានចាប់ផ្តើមការបាញ់ប្រហារទៅមកជាមួយអ៊ីស្រាអែល កាលពីថ្ងៃទី០៨ ខែតុលា មួយថ្ងៃបន្ទាប់ពីក្រុមហាម៉ាស វាយប្រហារភាគខាងត្បូងអ៊ីស្រាអែល និងបានបង្កឱ្យមានសង្រ្គាមហ្កាហ្សា។

អ៊ីស្រាអែល បានចាត់ទុកក្រុមហេសបូឡា ជាយូរមកហើយថាជាការគំរាមកំហែងដ៏ធំបំផុតនៅព្រំដែនរបស់ខ្លួន ហើយបារម្ភកាន់តែខ្លាំងចំពោះកំណើនឃ្លាំងអាវុធ និងទីតាំងដែលក្រុមនេះបង្កើតឡើងនៅស៊ីរី។ មនោគមវិជ្ជារបស់ហេសបូឡា ត្រូវបានកំណត់យ៉ាងទូលំទូលាយដោយជម្លោះជាមួយអ៊ីស្រាអែល។ ក្រុមនេះត្រូវបានបង្កើតឡើងដោយឆ្មាំបដិវត្តន៍អ៊ីរ៉ង់ក្នុងឆ្នាំ១៩៨២ ដើម្បីប្រយុទ្ធប្រឆាំងនឹងកងកម្លាំងអ៊ីស្រាអែល ដែលបានលុកលុយលីបង់ក្នុងឆ្នាំនោះ។

ក្រុមហេសបូឡា ចាត់ទុកអ៊ីស្រាអែល ជារដ្ឋមិនស្របច្បាប់ដែលបានបង្កើតឡើងនៅលើទឹកដីកាន់កាប់ប៉ាឡេស្ទីន ហើយចង់ឱ្យរដ្ឋជ្វីហ្វនេះបាត់ខ្លួន។ ជម្លោះបច្ចុប្បន្នបានធ្វើឱ្យភាគីទាំងសងខាងខូចខាតធ្ងន់ធ្ងររួចទៅហើយ។ មនុស្សរាប់ម៉ឺននាក់ត្រូវបានបង្ខំឱ្យភៀសខ្លួនចេញពីផ្ទះសម្បែងរបស់ពួកគេនៅសងខាងព្រំដែន ហើយការវាយប្រហាររបស់អ៊ីស្រាអែល បានសម្លាប់យុទ្ធជនហេសបូឡា ប្រមាណ៣៥០ នាក់នៅលីបង់ និងជនស៊ីវិលជាង ១០០នាក់របួស។

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានព្រមានកាលពីខែធ្នូថា ទីក្រុងបេរ៉ូត នឹងត្រូវខ្ទេច «ដូចតំបន់ហ្កាហ្សា» បើក្រុមហេសបូឡា ចាប់ផ្តើមសង្រ្គាមពេញលេញ។ កន្លងមកក្រុមហេសបូឡា បានផ្តល់សញ្ញាថា ខ្លួនមិនចង់ពង្រីកជម្លោះទេ ខណៈនិយាយផងដែរថា បានត្រៀមខ្លួនជាស្រេចដើម្បីប្រយុទ្ធនឹងសង្គ្រាមណាមួយដែលដាក់លើខ្លួន ហើយព្រមានថាខ្លួនបានប្រើត្រឹមតែផ្នែកតូចមួយនៃសមត្ថភាពរបស់ខ្លួនប៉ុណ្ណោះរហូតមកដល់ពេលនេះ៕