ការតវ៉ា បានផ្ទុះឡើងនៅទីក្រុងញូវដេលី ប្រទេសឥណ្ឌា កាលពីថ្ងៃអាទិត្យ ដែលមនុស្សរាប់ពាន់នាក់បានចេញធ្វើបាតុកម្ម ខណៈនិស្សិតបីនាក់បានស្លាប់ បន្ទាប់ពីលង់ទឹកដោយសារទឹកភ្លៀង ហូរចូលពេញបន្ទប់ក្រោមដីនៃមជ្ឈមណ្ឌលសិក្សា។

មន្ត្រីពន្លត់អគ្គិភ័យ បាននិយាយថា ឧបទ្ទវហេតុនេះ បានកើតឡើងកាលពីថ្ងៃសៅរ៍ នៅពេលនិស្សិតមួយចំនួនកំពុងសិក្សានៅក្នុងបណ្ណាល័យ ដែលត្រូវបានសាងសង់នៅក្នុងបន្ទប់ក្រោមដីនៃមជ្ឈមណ្ឌលសិក្សា ដោយបានបណ្តាលឲ្យនិស្សិតស្រីពីរនាក់ និងនិស្សិតប្រុសម្នាក់ស្លាប់។

ភ្លៀងធ្លាក់ខ្លាំងនៅពេលល្ងាច បានបណ្តាលឱ្យមានការលិចលង់យ៉ាងខ្លាំង នៅតាមដងផ្លូវនៅខាងក្រៅមជ្ឈមណ្ឌល បន្ទាប់មកទឹកបានហូរចូលទៅក្នុងបន្ទប់ក្រោមដី។

ក្រុមនិស្សិត បានរួមគ្នារៀបចំការតវ៉ានៅខាងក្រៅមជ្ឈមណ្ឌល ទាមទារឲ្យមានវិធានការតឹងរ៉ឹងចំពោះករណីនេះ។

ទន្ទឹមនឹងនេះ ក្រុមបាតុករមួយក្រុមទៀត បានបិទផ្លូវនៅខាងក្រៅស្ថានីយ៍រថភ្លើងក្រោមដី នៅក្នុងទីក្រុង ជំរុញឱ្យនគរបាលឃាត់ខ្លួនពួកគេមួយចំនួន។ ក្រុមនិស្សិត បាននិយាយថា អាជ្ញាធរកំពុងលាក់ចំនួនពិតប្រាកដនៃអ្នកស្លាប់ និងទាមទារឱ្យស្ថាប័នពាក់ព័ន្ធក្នុងតំបន់ទទួលខុសត្រូវចំពោះឧបទ្ទវហេតុនេះ។ ក្រុមអ្នកតវ៉ា ក៏បានរៀបចំភ្លើងទៀនដើម្បីទាមទាររកយុត្តិធម៌ឲ្យជនរងគ្រោះ។