មេដឹកនាំកំពូលរបស់អ៊ីរ៉ង់ កាលពីថ្ងៃអាទិត្យ (២៨ កក្កដា) បានយល់ព្រមជាផ្លូវការឱ្យលោក ម៉ាស៊ូដ ប៉េហ្សេស្គីអាន (Masoud Pezeshkian) ជាប្រធានាធិបតី ដោយអនុញ្ញាតឱ្យអ្នកនយោបាយកំណែទម្រង់ និងជាគ្រូពេទ្យវះកាត់បេះដូងរូបនេះ ទទួលបន្ទុកលើប្រទេសដែលចុះខ្សោយដោយសារទណ្ឌកម្មសេដ្ឋកិច្ច ជុំវិញកម្មវិធីនុយក្លេអ៊ែររបស់ខ្លួន។

ក្នុងអំឡុងពិធីផ្ដល់ការយល់ព្រមនោះ លោក អាយ៉ាតូឡា អាលី ខាមីណេ (Ayatollah Ali Khamenei) បានជំរុញឱ្យលោក Pezeshkian ផ្តល់អាទិភាពដល់ប្រទេសជិតខាង ប្រជាជាតិអាហ្រ្វិក និងអាស៊ី ព្រមទាំងប្រទេសដែលបាន «គាំទ្រ និងជួយ» អ៊ីរ៉ង់ នៅក្នុងគោលនយោបាយទំនាក់ទំនងការបរទេសរបស់ទីក្រុងតេអេរ៉ង់ ខណៈរិះគន់អាមេរិក អឺរ៉ុប និងអ៊ីស្រាអែល ចំពោះភាពតានតឹងក្នុងតំបន់។

ថ្លែងក្នុងពិធីដដែលនោះ លោក Pezeshkian បានគោរពវិញ្ញាណក្ខន្ធលោកឧត្តមសេនីយ កាសេម សូលេមានី (Qassem Soleimani) ដែលជាស្ថាបត្យករនៃសកម្មភាពយោធាក្នុងតំបន់របស់អ៊ីរ៉ង់ ដែលត្រូវបានសម្លាប់នៅក្នុងការវាយប្រហារដោយយានដ្រូនរបស់អាមេរិកក្នុងឆ្នាំ២០២០។ លោកបានរំលឹកឡើងវិញនូវការបេជ្ញារបស់លោកក្នុងការបន្តគោលនយោបាយការបរទេស «ប្រកបដោយការស្ថាបនា និងប្រកបដោយប្រសិទ្ធភាព» ជំរុញនីតិរដ្ឋផ្តល់ឱកាសស្មើៗគ្នាដល់ប្រជាពលរដ្ឋ គាំទ្រគ្រួសារ និងការពារបរិស្ថាន។

លោក Pezeshkian ចូលកាន់តំណែងបន្តពីលោក អ៊ីប្រាហ៊ីម រ៉េស៊ី (Ebrahim Raisi) ដែលបានស្លាប់នៅក្នុងការធ្លាក់ឧទ្ធម្ភាគចក្រកាលពីខែឧសភា ដែលបង្កឱ្យមានការបោះឆ្នោតមុនកំណត់។ លោកនឹងស្បថចូលកាន់តំណែងនៅក្នុងសភានៅថ្ងៃអង្គារ (៣០ កក្កដា) ស្អែកនេះ ហើយនឹងមានពេលពីរសប្តាហ៍ដើម្បីបង្កើតគណៈរដ្ឋមន្ត្រីផ្ទាល់ខ្លួនសម្រាប់ការបោះឆ្នោតនៅក្នុងសភា៕