លោក កាំង សេន អនុប្រធានក្រុមប្រឹក្សាភិបាលក្រុមហ៊ុនខេមបូឌានព្រីមៀរលីគ(CPL) បាន​ចាត់​ទុក​ព្រឹត្តិការណ៍បាល់ទាត់មិត្តភាព រវាងភាគីពាក់ព័ន្ធ កាលពីល្ងាចថ្ងៃទី២៨ ខែកក្កដា ឆ្នាំ២០២៤ គឺ​ជា​កម្លាំងចលករថ្មីមួយ ដើម្បីបុព្វហេតុរួមគ្នាបំផុស និងលើកស្ទួយវិស័យកីឡាបាល់ទាត់ជាតិ ពិសេស​លីគកំពូលកម្ពុជាឲ្យកាន់តែរីកចម្រើន ។

ការគូស​បញ្ជាក់នេះ បន្ទាប់ពីការប្រកួតមិត្តភាពរវាងភាគី​ពាក់ព័ន្ធ CPL កាលពីល្ងាចអាទិត្យ​កន្លង​ទៅ មានវត្តមានថ្នាក់ដឹកនាំក្នុងជួររាជរដ្ឋាភិបាល ថ្នាក់ដឹកនាំសហព័ន្ធ ថ្នាក់ដឹកនាំក្លិប ដៃគូ​សហការ​ និងអ្នកគាំទ្រជាច្រើន បានចូលរួមប្រកួតនៅកីឡដ្ឋាន អេអាយអេ ខេអឹមអេកផាក ប្រកប​ដោយស្មារតីមិត្តភាព សាមគ្គីភាព និងសប្បាយរីករាយ ។

ចំពោះថ្នាក់​ដឹកនាំ ដែលបានចូលរួមប្រកួត និងអបអរសាទរព្រឹត្តិការណ៍នេះ មានដូចជាឯកឧត្តម ហ៊ុន ម៉ានី ឧបនាយករដ្ឋមន្ដ្រី រដ្ឋមន្ដ្រីក្រសួងមុខងារសាធារណៈ, ឯកឧត្តម សាយ សំអាល់ ឧបនាយករដ្ឋមន្ដ្រី រដ្ឋមន្ដ្រីក្រសួងរៀបចំដែនដី នគរូបនីយកម្ម និងសំណង់, ឯកឧត្តម សៅ សុខា ប្រធាន​សហព័ន្ធកីឡាបាល់ទាត់កម្ពុជា, ឯកឧត្តម ឌី វិជ្ជា ប្រធានក្លិបព្រះខ័នរាជស្វាយរៀង ជើងឯក​លីគ​កំពូលកម្ពុជា និងថ្នាក់ដឹកនាំក្លិបផ្សេងៗទៀត ។

លោក កាំង សេន បានបញ្ជាក់ថា កម្មវិធីនេះ រៀបចំឡើងក្នុងគោលបំណងប្រមូលផ្ដុំគ្នា បង្រួប​បង្រួម​គ្នា និងបណ្ដុះស្មារតី រវាងគ្រប់ភាគីពាក់ព័ន្ធ ដើម្បីផ្សារភ្ជាប់ទំនាក់ទំនងផង និងរួម​គ្នា​រុញបាល់ទាត់ ដែលពិបាកនឹងរុញឲ្យធ្វើដំណើរបន្ដិចម្ដងៗ ឆ្ពោះទៅការអភិវឌ្ឍ និងរីកចម្រើន ស្របតាមពាក្យស្លោករបស់ CPL ដែលត្រូវសម្ពោធដាក់ឲ្យប្រើប្រាស់ក្នុងលីគរដូវកាលថ្មី គឺ «លីគខ្លាំង ជម្រើសជាតិខ្លាំង» ។

ចំណែកកីឡាករ លឹម ពិសុទ្ធ និងអ្នកគាំទ្រលីគកំពូលកម្ពុជា បានសម្ដែងក្ដីរីករាយ និងគាំទ្រ ចំពោះការរៀបចំព្រឹត្តិការណ៍ដ៏មានសារៈសំខាន់នេះឡើង ដើម្បីពន្ញាក់អារម្មណ៍បងប្អូន​ប្រជា​ពលរដ្ឋ ក៏ដូចជាអ្នកគាំទ្រ ស្របពេលលីគកំពូលកម្ពុជា រដូវកាលថ្មី ខិតជិតមដល់ ដើម្បីឲ្យ​ពួកគេ​ចូល​រួម​គាំទ្រឲ្យបានច្រើន ក្នុងន័យរួមចំណែកជំរុញការអភិវឌ្ឍវិស័យ​កីឡា​បាល់ទាត់​ជាតិ​ឲ្យ​កាន់​តែ​រីក​ចម្រើនបន្ថែមទៀត ។

គួរដឹងថា ការប្រកួតមិត្តភាពរវាងភាគីពាក់ព័ន្ធ CPL នេះ ធ្វើឡើង ២សប្ដាហ៍មុនបើករដូវកាលថ្មី នៃលីគកំពូលកម្ពុជា ឆ្នាំ២០២៤/២៥ ដែលគ្រោងនឹងចាប់ផ្ដើមការប្រកួតនាថ្ងៃទី១០ ខែសីហា​ខាងមុខ ៕អត្ថបទ លី ឈុនឡា