លោក ចេកគ្វីមេន ស្សាបានី(Jacquemain Shabani) ឧបនាយករដ្ឋមន្ត្រីក្រសួងមហាផ្ទៃ បាននិយាយកាលពីថ្ងៃអាទិត្យថា សកម្មភាពមិនមែនកីឡាទាំងអស់ នឹងត្រូវផ្អាករហូតដល់មានការជូនដំណឹងបន្ថែមនៅកន្លែងលេងកីឡាក្នុងទីក្រុង Kinshasa រដ្ឋធានីសាធារណរដ្ឋប្រជាធិបតេយ្យកុងហ្គោ មួយថ្ងៃបន្ទាប់ពីឧបទ្ទវហេតុរត់ជាន់គ្នា បណ្តាលឲ្យមនុស្សយ៉ាងហោចណាស់៩នាក់ស្លាប់ ក្នុងអំឡុងពេលការប្រគុំតន្ត្រីនៅ Stade des Martyrs ជាមជ្ឈមណ្ឌលកីឡាដ៏ធំ នៅក្នុងរដ្ឋធានីរបស់ប្រទេស។

លោក Shabani បាននិយាយបន្ទាប់ពីកិច្ចប្រជុំស្តីពីវិបត្តិ ដែលបានធ្វើឡើងកាលពីថ្ងៃអាទិត្យថា ទាំង មណ្ឌលកីឡា Stade des Martyrs និង Stade de Tata Raphael នៅក្នុងទីក្រុង Kinshasa ត្រូវបានដាក់ក្នុងបញ្ជី សម្រាប់ការហាមឃាត់។

ឧបទ្ទវហេតុរត់ជាន់គ្នាកាលពីថ្ងៃសៅរ៍ បានកើតឡើងអំឡុងពេលការប្រគុំតន្ត្រីរបស់តន្ត្រីករ Mike Kalambayi នៅមជ្ឈមណ្ឌលកីឡា Stade des Martyrs ក្នុងទីក្រុង Kinshasa ជាកន្លែងដែលមនុស្សយ៉ាងហោចណាស់៩នាក់ រួមទាំងស្ត្រីមានផ្ទៃពោះ និងកុមារម្នាក់ បានស្លាប់។

លោក Shabani បានបញ្ជាក់ថា អាទិភាពរបស់យើងគឺរក្សាប្រជាជនរបស់យើងឱ្យមានសុវត្ថិភាព។ យើងមិនអាចអត់ឱនចំពោះព្រឹត្តិការណ៍បុណ្យនានាដែលបង្កគ្រោះថ្នាក់ដល់អាយុជីវិតប្រជាជនរបស់យើងឡើយ។ សកម្មភាពទាំងអស់ ត្រូវបានផ្អាកជាបណ្តោះអាសន្ន ខណៈអ្នករៀបចំនឹងត្រូវពិចារណាពីទីតាំងផ្សេងទៀតដែលមានសុវត្ថិភាពជាងមុនសម្រាប់ព្រឹត្តិការណ៍របស់ពួកគេ។

លោក Roger Kamba រដ្ឋមន្ត្រីក្រសួងសុខាភិបាល បាននិយាយកាលពីថ្ងៃសៅរ៍ថា ជនរងគ្រោះបានស្លាប់ដោយសារតែថប់ដង្ហើម។

ដោយមានកន្លែងអង្គុយចំនួន ៨០.០០០កន្លែង មណ្ឌលកីឡា Stade de Martyrs ត្រូវបានគេជឿថាធំជាងគេបំផុតនៅក្នុងប្រទេស គឺជាកន្លែងដ៏ពេញនិយមសម្រាប់ការប្រគុំតន្ត្រី ព្រឹត្តិការណ៍វប្បធម៌ ព្រមទាំងការជួបប្រជុំផ្នែកនយោបាយ ហើយប្រភពព័ត៌មានពីសន្តិសុខ បាននិយាយថា វាលើសចំណុះនៅពេលកើតហេតុ។