ខណៈនៅថ្ងៃទី៥ ខែសីហាខាងមុខនេះកម្ពុជានឹងប្រារព្ធពិធីបើកការដ្ឋានសាងសង់​ព្រែកជីក​ហ្វូណន​តេជោ។ មន្រ្តីរាជការ បុគ្គលិក សាស្រ្តាចារ្យ និងសិស្ស និស្សិតជាច្រើននាក់​នៃ​វិទ្យាស្ថាន​ជាតិ​សហគ្រិនភាព និងនវានុវត្តន៍ (NIEI) បានប្រកាសត្រៀមរួច​ជា​ស្រេច​នូវ​ឧបករណ៍​សំខាន់ៗ​មួយ​ចំនួន ដើម្បីអបអរសាទរការបើកការដ្ឋានព្រែកជីកនេះ​ដែល​ជា​កេរមរតក​ប្រវត្តិសាស្ត្រ​សម្រាប់​កូន​ចៅខ្មែរគ្រប់ៗរូប។

ឯកឧត្តមបណ្ឌិត តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ ក្នុងបទ​សម្ភាសន៍​ជាមួយព័ត៌មាន ប៊ីធីវី បានមានប្រសាសន៍ថា ដើម្បីអបអរសាទរ​ការបើក​ការដ្ឋាន​សាងសង់​ព្រែកជីកហ្វូណនតេជោ មន្រ្តី រាជការ បុគ្គលិក លោកគ្រូ អ្នកគ្រូ រួមជាមួយសិស្សនិស្សិត​ជា​ច្រើន​នាក់ថែមទៀត នឹងណាត់ជួបប្រជុំគ្នាចាប់ម៉ោង៦កន្លះព្រឹកតទៅ នៅថ្ងៃទី៥ ខែសីហា ឆ្នាំ២០២៤ ដោយមានជាស្គរ គង ប៉ោត និងត្រដោកជាដើម ដើម្បីគោះបង្ហាញអំពីអ្វីដែលជាឆន្ទៈ និងគាំទ្រយ៉ាងពេញទំហឹងនូវអ្វីដែលមានសម្រាប់ជាផលប្រយោជន៍របស់ប្រទេសជាតិទាំងមូល ដែលជា ”គម្រោងរបស់ខ្មែរទាំងអស់គ្នា ដោយខ្មែរ និងដើម្បីខ្មែរគ្រប់រូប” និងផ្តល់ផល​ប្រយោជន៍​ដ៏​មហា​សាល​ដល់សង្គម សេដ្ឋកិច្ចកម្ពុជា ជាពិសេសជាមរតក​ប្រវត្តិសាស្រ្ត​សម្រាប់​កូន​ចៅ​ជំនាន់​ក្រោយ​ទាំងអស់គ្នា។

លោក ជឹម ចន្ថន ប្រធានយុវជនក្រុម១៨ ប្រចាំវិទ្យាស្ថានជាតិសហគ្រិនភាព និងនវានុវត្តន៍ បានបង្ហាញការគាំទ្រយ៉ាងពេញទំហឹងចំពោះការអនុវត្តគម្រោងព្រែកជីកហ្វូណនតេជោនេះ ដែលតភ្ជាប់ផ្លូវទឹក រវាងទន្លេរទៅកាន់សមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ ដែលនឹងផ្តល់អ​​ត្ថ​ប្រយោជន៍​ដ៏​មហាសាល​ដល់​ប្រទេស​កម្ពុជា។

ស្រដៀងគ្នាខាងលើនេះ អ្នកស្រី ថេត ផារីយា តំណាងឲ្យសិស្សជាច្រើន​នាក់​ផ្សេង​ទៀត​ដែល​កំពុង​ទទួល​ការ​បណ្តុះបណ្តាលជំនាញបច្ចេកទេស និងវិជ្ជាជីវៈ នៅវិទ្យាស្ថាន NIEI បានបង្ហាញ​ការ​គាំទ្រ និងសម្តែងការជូនពរចំពោះថ្នាក់ដឹកនាំ ក៏ដូចជាក្រុមការងារដែលត្រូវបំពេញបេសកម្ម​ក្នុង​គម្រោ​ង​នេះ ឲ្យប្រព្រឹត្តទៅដោយរលូន និងជោគជ័យគ្រប់ភារកិច្ច។

ដើម្បីជាកា​រ​អបអរសាទរការបើកការដ្ឋានសាងសង់ព្រែកជីកហ្វូណនតេជោ នាពេលខាងមុខនេះ រាជរដ្ឋាភិបាលកម្ពុជា បានចេញសារាចរណែនាំដល់សាធារណជន ក្រសួង ស្ថាប័ន ទាំងថ្នាក់ជាតិ និងថ្នាក់ក្រោមជាតិទាំងអស់ ចូលរួមឲ្យបានកុះករ និងអធិកអធម តាមរយៈការទូងស្គរ វាយគង ជួង រគាំង ទះប៉ោត និងគោះត្រដោក តាមគ្រប់មធ្យោបាយ នៅវេលាម៉ោង ៩:០៩នាទីព្រឹក៕អត្ថបទ ឈិត បូរ៉ាវី