ភ្នំពេញ៖ សេចក្ដីសម្រេចរបស់រដ្ឋបាលរាជធានីភ្នំពេញ ដែល BTV ទទួលបាននៅយប់ថ្ងៃទី២ ខែកញ្ញាបានឱ្យ ដឹងថា រដ្ឋបាលរាជធានីបានសម្រេចបង្កើតក្រុមការងារត្រួតពិនិត្យ និងវាយតម្លៃ ការបើកដំណើរការឡើងវិញនូវ គ្រឹះស្ថានសិក្សា ចំណេះទូទៅគ្រប់កម្រិត ថ្នាក់រាជធានីភ្នំពេញ និងថ្នាក់ខណ្ឌ នៃរដ្ឋបាលរាជធានីភ្នំពេញ។
ក្រុមការងារនេះ មានតួនាទី ពិនិត្យ ពិភាក្សា និងកំណត់ភូមិសាស្ត្រ មានហានិភ័យខ្ពស់ ហានិភ័យទាប និងគ្មានហានិភ័យ នៃការឆ្លងរីករាលដាលជំងឺកូវីដ-១៩ ដើម្បីបើកដំណើរការឡើងវិញនូវគ្រឹះស្ថានសិ ក្សា ចំណេះទូទៅគ្រប់កម្រិត នៅក្នុងភូមិសាស្ត្រ រាជធានីភ្នំពេញ។
ក្រៅពីនេះក្រុមការងារត្រូវដាក់ចេញនូវវិធានការចាំបាច់ ដើម្បីគាំទ្រ និងពង្រឹងការគ្រប់គ្រង ការរីករាលដាលជំងឺកូវីដ-១៩ នៅតាមគ្រឹះស្ថានសិក្សា ចំណេះទូទៅគ្រប់កម្រិត រួមទាំងការបាញ់ថ្នាំ សម្លាប់មេរោ គ នៅតាមគ្រឹះស្ថាន សិក្សាសាធារណៈ និងណែនាំដល់គ្រឹះស្ថានសិក្សាឯកជន ឱ្យបាញ់ថ្នាំសម្លាប់មេរោគ មុននឹងបើកដំណើរការឡើងវិញ ដើម្បីចៀសវាងហានិភ័យនៃការចម្លងជំងឺកូវីដ-១៩ ក្នុងគ្រឹះស្ថានសិក្សា។
ក្រុមការងារក៏ត្រូវជំរុញ និងលើកទឹកចិត្តដល់គណៈនាយក លោកគ្រូ-អ្នកគូ បុគ្គលិកអប់រំ មាតាបិតា អា ណាព្យាបាល និងសិស្សានុសិស្ស ឱ្យយកចិត្តទុកដាក់ អនុវត្តតាមការណែនាំរបស់ក្រសួងសុខាភិបាល និងត្រូវប្រកាន់ខ្ជាប់ជានិច្ចនូវវិធានការ“៣.ការពារ និង៣កុំ” របស់សម្តេចតេជោនាយករដ្ឋមន្ត្រីជានិច្ច៕ ដោយ៖ គង់ ឌិន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
