ចាប់តាំងពីខែតុលាមក ការវាយប្រហារឆ្លងព្រំដែនជិតរាល់ថ្ងៃ រវាងអ៊ីស្រាអែល និងក្រុមហេសបូឡាហ៍ ដែលជាកងជីវពលគាំទ្រដោយអ៊ីរ៉ង់ដ៏មានឥទ្ធិពល និងចលនានយោបាយ នៅក្នុងប្រទេសលីបង់ បានសម្លាប់មនុស្សរាប់រយនាក់ និងបង្ខំឲ្យរាប់ម៉ឺននាក់ទៀតចាកចេញពីផ្ទះរបស់ពួកគេ សម្រាប់ភាគីទាំងសងខាង ដោយនេះបានបង្កើនឲ្យមានការភ័យខ្លាចថា អំពើហិង្សានេះអាចរីករាលដាលទៅជាជម្លោះដ៏ខ្លាំងក្លា។

តែយ៉ាងណាក្ដី ចំពេលមានការវាយប្រហារ និងការវាយប្រហារសងសឹក មានការចង្អុលបង្ហាញថា ពួកគេកំពុងព្យាយាមចៀសវាងការប្រឈមមុខដាក់គ្នា។ ប៉ុន្តែការគណនាខុស គឺតែងតែជាហានិភ័យ ហើយការវាយប្រហារ កាលពីថ្ងៃសៅរ៍ (ទី២៨ ខែកក្កដា) លើទីក្រុង Druze នៃ Majdal Shams នៅតំបន់ Golan Heights ដែលកាន់កាប់ដោយអ៊ីស្រាអែល អាចជារឿងប៉ាន់ស្មានខុសនោះ។

អ៊ីស្រាអែលចោទប្រកាន់ក្រុមហេសបូឡាហ៍ថា បានធ្វើការវាយប្រហារលើទីលានបាល់ទាត់ ដែលបានបណ្ដាលឲមនុស្សយ៉ាងហោចណាស់ ១២នាក់ ស្លាប់ ក្នុងនោះរួមមានទាំងកុមារផងដែរ ដែលជាការវាយប្រហារដ៏សាហាវបំផុត នៅក្នុងអរិភាពបច្ចុប្បន្ន ហើយបានសន្យាថា នឹងឆ្លើយតបវិញ។

នៅក្នុងសេចក្តីថ្លែងការណ៍មួយ ដែលចេញផ្សាយដោយការិយាល័យរបស់លោក លោកនាយករដ្ឋមន្ត្រីអ៊ីស្រាអែល Benjamin Netanyahu បាននិយាយថា៖ «អ៊ីស្រាអែលនឹងមិនមើលរំលងការវាយប្រហារឃាតកម្មនេះទេ។ ក្រុមហេសបូឡាហ៍នឹងទទួលបានផលយ៉ាងស័ក្ដិសម ដែលខ្លួនមិនទាន់បានទទួល រហូតមកដល់ពេលនេះ»។

តែយ៉ាងណាក៏ដោយ ក្រុមហេសបូឡាហ៍បានបដិសេធមិនបាននៅពីក្រោយការវាយប្រហារនេះ។

នៅប្រទេសលីបង់ ភាគច្រើននៃការវាយប្រហាររបស់អ៊ីស្រាអែលបានធ្លាក់ចំភាគខាងត្បូង ជាកន្លែងដែលភូមិជាច្រើន ត្រូវបានបំផ្លាញ និងបោះបង់ចោល ហើយនិងវាយប្រហារចំភាគខាងកើត Bekaa Valey ជាតំបន់ចំនួន ២ ដែលក្រុមហេសបូឡាហ៍ធ្វើប្រតិបត្តិការ។ យុទ្ធនាការរបស់អ៊ីស្រាអែល សំដៅលើទីតាំងដែលរហូតមកដល់ពេលនេះ មិនត្រូវបានប៉ះពាល់ ក្នុងរួមទាំងផ្នែកខ្លះនៃរដ្ឋធានី Beirut ផងដែរ អាចនាំទៅដល់ដំណាក់កាលដ៏គ្រោះថ្នាក់ និងមិនអាចទាយទុកជាមុនបាននៅក្នុងការប្រយុទ្ធរបស់ពួកគេនេះ៕