កាលពីថ្ងៃអាទិត្យម្សិលមិញ ពលរដ្ឋអ៊ុយក្រែនរាប់ពាន់នាក់ នាំគ្នាដង្ហែក្បួននៅតាមដងផ្លូវក្នុងទីក្រុងគីវ ដើម្បីរំឭកដល់វិញ្ញាណក្ខន្ធឈ្លើយសឹកអ៊ុយក្រែន ដែលត្រូវបានសម្លាប់នៅក្នុងពន្ធនាការ Olenivka របស់រុស្ស៊ី ។

គួរឲ្យដឹងថា ឈ្លើយសឹកអ៊ុយក្រែនជាង ៥០នាក់ ត្រូវបានសម្លាប់ អំឡុងការវាយប្រហារលើបន្ទាយ Olenivka កាលពីខែកក្កដា ឆ្នាំ ២០២២ ដែលភាគច្រើននៃពួកគេ គឺជាទាហានការពាររោងចក្រដែកថែប Azovstal ស្ថិតក្នុងទីក្រុង Mariupol មុនពេលប្រគល់ខ្លួនឲ្យកងកម្លាំងរុស្ស៊ី ។

អ្នកស្រី Yuliia បានមករំឭកវិញ្ញាណក្ខន្ធស្វាមី Bohdan Hryshkevych គឺជាគ្រូពេទ្យបឋមក្នុងកងវរសេនាធំ Azov ដែលត្រូវបានសម្លាប់អំឡុងការចាប់ខ្លួននៅពន្ធនាការ Olenivka ។ កូនស្រីវ័យ ៥ឆ្នាំរបស់ពួកគេ កាន់បដាសរសេរថា “ខ្ញុំលែងអាចឱបប៉ារបស់ខ្ញុំម្តងទៀតបានហើយ” ។ 

កងវរសេនាធំ Azov គឺជាអង្គភាពមួយនៅក្នុងកងឆ្មាំជាតិអ៊ុយក្រែន ដែលទទួលបានការចាប់អារម្មណ៍យ៉ាងខ្លាំងសម្រាប់តស៊ូរបស់ពួកគេចំពោះការឡោមព័ទ្ធរបស់រុស្ស៊ីនៅរោងចក្រដែកថែបក្នុងទីក្រុង Mariupol ។

ក្រោយពេលប្រយុទ្ធអស់រយៈពេលជាច្រើនសប្តាហ៍ពីលេណដ្ឋាន និងផ្លូវរូងក្រោមដី ក្រុមយុទ្ធជនកងវរសេនាធំ Azov បានសុំចុះចាញ់កងកម្លាំងគាំទ្រដោយរុស្ស៊ី កាលពីខែឧសភា ឆ្នាំ ២០២២ ។

នៅថ្ងៃទី ២៩ ខែកក្កដា ឆ្នាំ ២០២២ ឈ្លើយសឹកអ៊ុយក្រែន ត្រូវបានសម្លាប់នៅក្នុងពន្ធនាគារ Olenivka ស្ថិតក្នុងតំបន់ Donetsk អំឡុងការផ្លោងគ្រាប់កាំភ្លើងដែលអ៊ុយក្រែន និងរុស្ស៊ី បានដាក់ការស្តីបន្ទោសលើគ្នាទៅវិញទៅមក ៕