ប្រធានគោលនយោបាយការបរទេសរបស់សហភាពអឺរ៉ុបលោក Josep Borrell បាននិយាយថា សហភាពអឺរ៉ុប បានអំពាវនាវឲ្យមានការស៊ើបអង្កេតជាអន្តរជាតិ លើការវាយប្រហារទៅលើតំបន់ខ្ពង់រាប Golan Heights និងបានជំរុញឲ្យភាគីទាំងអស់ បង្ហាញការអត់ធ្មត់ និងជៀសវាងការកើនឡើងភាពតានតឹង។

លោក បានសរសរនៅលើបណ្តាញសង្គម X របស់ខ្លួនថា៖ «មានរូបភាពដ៏គួរឲ្យភ្ញាក់ផ្អើលជាច្រើនពីទីលានបាល់ទាត់ក្នុងសហគមន៍ Druze នៃទីក្រុងMajdal Shams ខ្ញុំសូមថ្កោលទោសយ៉ាងដាច់អហង្ការចំពោះការបង្ហូរឈាមនេះ។ យើងត្រូវការការស៊ើបអង្កេតឯករាជ្យជាអន្តរជាតិទៅលើចំពោះឧប្បត្តិហេតុ ដែលមិនអាចទទួលយកបាននេះ។ យើងជំរុញឲ្យភាគីទាំងអស់ អនុវត្តការអត់ធ្មត់ជាអតិបរមា និងជៀសវាងការកើនឡើងភាពតានតឹងបន្ថែមទៀត»។

មុននេះ កងកម្លាំងការពារអ៊ីស្រាអែល (IDF) បាននិយាយថា ភាគខាងជើងនៃប្រទេសនេះ រួមទាំងតំបន់ខ្ពង់រាប Golan Heights ដែលគ្រប់គ្រងដោយអ៊ីស្រាអែល បានរងការបាញ់ផ្លោងយ៉ាងធ្ងន់ធ្ងរ ពីប្រទេសលីបង់។ យ៉ាងហោចណាស់គ្រាប់រ៉ុក្កែតមួយ បានធ្លាក់ទៅលើទីលានបាល់ទាត់ នៅក្នុងសហគមន៍ Druze នៃ ទីក្រុង Majdal Shams ។ យោងតាមរបាយការណ៍ចុងក្រោយ មនុស្ស ១២នាក់ ក្នុងនោះមានកុមារ និងក្មេងជំទង់ ត្រូវបានសម្លាប់ និង ១៩នាក់ ផ្សេងទៀត រងរបួស។

កងកម្លាំងការពារអ៊ីស្រាអែល (IDF) បាននិយាយថា គ្រាប់រ៉ុក្កែត ត្រូវបានបាញ់ដោយក្រុមប្រដាប់អាវុធ ហេសបូឡា ពីភូមិChebaa ដែលជាភូមិមួយនៅភាគខាងត្បូងប្រទេសលីបង់។ ក្រុមហេសបូឡា បានបដិសេធថា មិនមានការពាក់ព័ន្ធក្នុងឧប្បត្តិហេតុនោះទេ។