កាលពីថ្ងៃអាទិត្យម្សិលមិញ ប្រជាពលរដ្ឋរស់នៅក្នុងទីក្រុងភាគខាងត្បូង Tyre ប្រទេសលីបង់ បង្ហាញពីអារម្មណ៍ច្របូកច្របល់ចំពោះអនាគតរបស់ពួកគេ បន្ទាប់ពីការប៉ះទង្គិចគ្នារវាងកងកម្លាំងអ៊ីស្រាអែល និងក្រុមឧទ្ទាមហេសប៊ូឡា ។

អ៊ីស្រាអែល បាននិយាយនៅព្រឹកថ្ងៃអាទិត្យថា ពួកគេនឹងវាយប្រហារខ្លាំងលើក្រុមជីវពលហេសប៊ូឡា ក្រោយចោទប្រកាន់ក្រុមគាំទ្រដោយអ៊ីរ៉ង់មួយនេះ ថាបានសម្លាប់កុមារ និងក្រុមយុវជនចំនួន ១២នាក់ នៅក្នុងការវាយប្រហាររ៉ុក្កែតលើទីលានបាល់ទាត់ ស្ថិតនៅតំបន់ Golan Heights គ្រប់គ្រងដោយអ៊ីស្រាអែលកាលពីថ្ងៃសៅរ៍ ។

ទោះបីជាយ៉ាងណាក៏ដោយ ក្រុមហេសប៊ូឡា បានធ្វើការច្រានចោលរាល់ទំនួលខុសត្រូវណាមួយចំពោះការវាយប្រហារមួយនេះ ។

លោក Hussam Saffeidine គឺជាពលរដ្ឋមួយរូបរស់នៅក្នុងទីក្រុង Tyre និយាយប្រាប់ទីភ្នាក់ងារព័ត៌មានរ៉យទ័រថា មាននូវអារម្មណ៍ភ័យខ្លាចនៅទីក្រុងតំបន់ឆ្នេរមួយនេះ ក្រោយការវាយប្រហារ ។

លោកបន្តថា ពួកយើងកំពុងតាមដានស្ថានភាពពី ១ថ្ងៃទៅ ១ថ្ងៃ ហើយបើសិនជាស្ថានភាពកើនឡើង ឬមិនកើនឡើង តាមបំណងរបស់ព្រះ នោះពួកយើងនឹងពេញចិត្ត ។

ប៉ុន្តែសម្រាប់លោក Ali Husseini ដែលជាម្ចាស់ធុរកិច្ចមួយរូប និយាយថា អតិថិជនរបស់លោកបន្តការរស់នៅប្រចាំថ្ងៃរបស់ពួកគេដូចធម្មតា ដោយពួកគេនាំគ្នាសម្រាកលំហែរកាយនៅតាមតំបន់ឆ្នេរ និងទទួលអាហារនៅតាមហាងកាហ្វេតំបន់ឆ្នេរ ។

លោកបាននិយាយប្រាប់ទីភ្នាក់ងារព័ត៌មានរ៉យទ័រថា មាននូវការព្រួយបារម្ភថាសត្រូវអ៊ីស្រាអែល នឹងសងសឹក ប៉ុន្តែប្រជាពលរដ្ឋរស់នៅធម្មតា ហើយនិងគ្មានទុក្ខព្រួយអ្វីនោះទេ ៕