ប្រធានាធិបតីចិនលោក Xi Jinping បានជំរុញឲ្យមានទំនាក់ទំនងកាន់តែជិតស្និតជាមួយអ៊ីតាលី ពីទស្សនៈវិស័យប្រវត្តិសាស្រ្ត អំឡុងជំនួបរបស់លោកជាមួយនាយករដ្ឋមន្រ្តីអ៊ីតាលីលោកស្រី Giorgia Meloni នៅទីក្រុងប៉េកាំងនាថ្ងៃចន្ទនេះ ។

អំឡុងជំនួបមួយនេះ លោក Xiអំពាវនាវឲ្យប្រទេសទាំង ២ ពិនិត្យមើលទំនាក់ទំនងទ្វេភាគី ពីទស្សនៈវិស័យយូរអង្វែង និងធ្វើការរួមគ្នាលើកិច្ចការអន្តរជាតិ ។

ដោយឡែក លោកស្រី Meloni និយាយថា អ៊ីតាលី អាចមានចំណែកដ៏សំខាន់នៅក្នុងទំនាក់ទំនងចិនជាមួយសហភាពអឺរ៉ុប ស្របពេលភាពតានតឹងពាណិជ្ជកម្មឡើងកម្តៅខ្លាំងរវាងប្លុកប្រទេសមានសមាជិក ២៧រដ្ឋមួយនេះ និងប្រទេសមហាអំណាចសេដ្ឋកិច្ចធំបំផុតលំដាប់ថ្នាក់លេខ ២របស់ពិភពលោក ។

លោកស្រី Meloni ដែលបានដឹកនាំរដ្ឋាភិបាលនិយមស្តាំចាប់តាំងពីឆ្នាំ ២០២២រហូតមក កំពុងស្ថិតនៅក្នុងប្រទេសចិន ដើម្បីធ្វើឲ្យល្អប្រសើរឡើងទំនាក់ទំនងពាណិជ្ជកម្មជាមួយទីក្រុងប៉េកាំង ក្រោយទីក្រុងរ៉ូម ដកខ្លួនចេញពីគម្រោងវិនិយោគហេដ្ឋារចនាសម្ព័ន្ធ “ផ្លូវមួយ និងខ្សែក្រវាត់មួយ” របស់លោក Xiកាលពីឆ្នាំមុន ៕