រដ្ឋមន្ត្រីការបរទេសអេស្ប៉ាញ លោក Jose Manuel Albares នៅថ្ងៃចន្ទ (២៩ កក្កដា) នេះ បានស្នើឲ្យវេណេស៊ុយអេឡាបញ្ចេញទិន្នន័យបោះឆ្នោតដែលអាចផ្ទៀងផ្ទាត់បាន បន្ទាប់ពីក្រុមប្រឹក្សាជាតិរៀបចំការបោះឆ្នោត បានប្រកាសថា ប្រធានាធិបតីលោក Nicolas Maduro បានឈ្នះតំណែងជាអាណត្តិទី៣ ពោលគឺជាលទ្ធផលផ្ទុយពីការស្ទង់មតិលើអ្នកចេញពីបោះឆ្នោត។

លោក Albares បានលើកឡើងឲ្យមានតម្លាភាព ដែលរដ្ឋមន្ត្រីការបរទេសអាមេរិក លោក Antony Blinken ប្រធានាធិបតីឈីលី លោក Gabriel Boric និងមេដឹកនាំអាមេរិកឡាទីនផ្សេងទៀត ក៏ទាមទារពីអាជ្ញាធរវេណេស៊ុយអេឡាដូចគ្នាដែរ។

គួរបញ្ជាក់ថា ប្រធានាធិបតី លោក Nicolas Maduro និងគូប្រជែងរបស់លោកខាងគណបក្សប្រឆាំង គឺលោក Edmundo Gonzalez នៅថ្ងៃចន្ទនេះ សុទ្ធតែបានអះអាងពីជ័យជម្នះដូចគ្នា នៅក្នុងការបោះឆ្នោតជ្រើសរើសប្រធានាធិបតីរបស់ប្រទេសវេណេស៊ុយអេឡា ខណៈដែលក្រុងវ៉ាស៊ីនតោន និងរដ្ឋាភិបាលបរទេសផ្សេងទៀត មានការសង្ស័យលើលទ្ធផលផ្លូវការ ដែលបានបន្តរក្សាតំណែងគណបក្សកាន់អំណាច។

អាជ្ញាធរជាតិរៀបចំការបោះឆ្នោត កាលពីពាក់កណ្តាលអធ្រាត្រថ្ងៃចន្ទ (ពេលវេលានៅប្រទេសវេណេស៊ុយអេឡា) បានប្រកាសឲ្យដឹងថា លោក Maduro បានឈ្នះអាណត្តិទី៣ ដោយទទួលបានសំឡេងឆ្នោតចំនួន ៥១ភាគរយ ជាលទ្ធផលដែលនឹងបន្តរយៈពេល ២៥ឆ្នាំនៃការគ្រប់គ្រងរបស់ក្រុមសង្គមនិយម៕