ប្រព័ន្ធផ្សព្វផ្សាយរុស្ស៊ី បានរាយការណ៍ថា យ៉ាងហោចណាស់មនុស្ស ២នាក់ ស្លាប់ និងរហូតដល់ ១០០នាក់ បានរងរបួស នៅថ្ងៃចន្ទ (ទី២៩ ខែកក្កដា) នេះ នៅពេលដែលរថភ្លើងដឹកអ្នកដំណើរ ៨០០នាក់ បានបុកជាមួយរថយន្តដឹកទំនិញ Kamaz ដោយបានធ្វើឲ្យទូរថភ្លើងចំនួន ៨ ក្រឡាប់ធា្លក់ចេញពីផ្លូវ។

សារព័ត៌មានទាំងនោះ បានឲ្យដឹងថា ទូរថភ្លើងខ្លះ ត្រូវបានបុករហូតដល់រុញ និងបានខូចខាតខ្ទេចខ្ទី នៅក្បែរផ្លូវរថភ្លើង។ ក្រសួងផ្នែកជួយសង្គ្រោះបន្ទាន់ បាននិយាយថា រថភ្លើងបានធ្វើដំណើរពីទីក្រុង Kazan ក្នុងតំបន់ Tatarstan ទៅកាន់ទីក្រុងតូច Adler នៅសមុទ្រខ្មៅ នៅពេលមានឧបទ្ទវហេតុបណ្ដាលឲ្យធ្លាក់ចេញពីផ្លូវ នៅក្នុងតំបន់ Volgograd ភាគខាងត្បូង ក្បែរស្ថានីយ៍ Kotelnikovo ដោយមានចម្ងាយប្រហែល ១.២០០គីឡូម៉ែត្រ នៅភាគខាងត្បូងនៃទីក្រុងម៉ូស្គូ។

អមដោយការប្រាប់បន្ថែមថា បុគ្គលិកសង្គ្រោះបន្ទាន់ចំនួន ៣២៤នាក់ បានចូលរួមក្នុងប្រតិបត្តិការនោះ ក្រសួងបានប្រាប់ឲ្យដឹងថា៖ «ក្រុមគ្រូពេទ្យសង្គ្រោះបន្ទាន់ កំពុងស្ថិតនៅកន្លែងកើតហេតុ»។ ក្រសួងបានប្រាប់ទៀតថា ឧទ្ធម្ភាគចក្រសង្គ្រោះបន្ទាន់ ក៏ត្រូវបានដាក់ពង្រាយយ៉ាងប្រញាប់ប្រញាល់ដែរ។

ឆាណែល Mash Telegram បានរាយការណ៍ពីឧបទ្ទវហេតុនេះថា យ៉ាងហោចណាស់មនុស្ស ២នាក់ បានបាត់បង់ជីវិត ប៉ុន្តែចំនួនអ្នកស្លាប់អាចនឹងកើនឡើង។ ចំណែកទីភ្នាក់ងារព័ត៌មាន Interfax បានឲ្យដឹងថា អ្នករងរបួស អាចនឹងមានរហូតដល់ ១០០នាក់៕