ប្រជាជនប៉ាឡេស្ទីនរាប់ពាន់នាក់បានភៀសខ្លួនចេញពីសហគមន៍មួយនៅភាគកណ្តាលហ្កាហ្សាស្ទ្រីបកាលពីថ្ងៃចន្ទសប្ដាហ៍នេះ ដោយប្រឈមការបញ្ជាជម្លៀសថ្មីតាមបញ្ជារបស់អ៊ីស្រាអែល ដែលធ្វើឲ្យស្ថានភាពមនុស្សធម៌កាន់តែយ៉ាប់យ៉ឺនខ្លាំងនៅក្នុងតំបន់ជម្លោះរួចទៅហើយ ស្របពេលពលរដ្ឋហ្កាហ្សាបន្តភៀសខ្លួនម្ដងហើយម្ដងទៀតចេញពីការវាយប្រហារនៅភាគខាងត្បូង។ 

ក្រុមអ៊ីស្លាមហាម៉ាស បានចោទប្រកាន់អ៊ីស្រាអែលថាបានរារាំងបទឈប់បាញ់ដោយនិយាយថារដ្ឋាភិបាលរបស់នាយករដ្ឋមន្ត្រី Benjamin Netanyahu បានបញ្ចូលលក្ខខណ្ឌថ្មីទៅក្នុងសំណើបទឈប់បាញ់យូរអង្វែងមួយនៅឯកិច្ចចរចាចុងក្រោយ ធ្វើឡើងតាមរយៈក្រុមអ្នកសម្របសម្រួលអន្តរជាតិ។

កងកម្លាំងអ៊ីស្រាអែល ដែលឥឡូវនេះបានដណ្តើមកាន់កាប់តំបន់ហ្កាហ្សាស្ទ្រីបស្ទើរតែទាំងមូលក្នុងសង្រ្គាមជិត ១០ខែនោះ បានចំណាយពេលជាច្រើនសប្តាហ៍ចុងក្រោយនេះ បើកប្រតិបត្តិការសំខាន់ៗនៅក្នុងតំបន់នានាជាទីដែលពួកគេធ្លាប់បានអះអាងថាបានបោសសម្អាតក្រុមយុទ្ធជនហាម៉ាសអស់ហើយនោះ។

មនុស្សរាប់រយពាន់នាក់បានប្រមូលផ្តុំគ្នានៅលើតំបន់ Deir al-Balah ជាទីក្រុងតូចមួយនៅកណ្តាលតំបន់ហ្កាហ្សា រងការឡោមព័ទ្ធដោយអ៊ីស្រាអែល ជាតំបន់សំខាន់តែមួយគត់ដែលមិនទាន់ត្រូវបានរង ការវាយប្រហារពីសង្រ្គាម ខណៈមនុស្សជាច្រើនត្រូវបានបង្ខំឲ្យទៅស្នាក់នៅទីនោះ ដោយសារតែការប្រយុទ្ធគ្នានៅក្នុងទីក្រុង Khan Younis ភាគខាងត្បូងបន្ថែមទៀតចាប់តាំងពីសប្តាហ៍មុន។

យោងតាមក្រុមមន្ត្រីសុខាភិបាល និងទីភ្នាក់ងារការពារជនស៊ីវិលហ្កាហ្សា ការវាយប្រហាររបស់អ៊ីស្រាអែល បានសម្លាប់ជនជាតិប៉ាឡេស្ទីន១៩នាក់ រួមទាំងកុមារ និងបណ្ដាលឲ្យមនុស្សជាច្រើននាក់ផ្សេងទៀតរងរបួស៕