ក្រសួងការបរទេសប៉េរូ កាលពីថ្ងៃចន្ទ (២៩ កក្កដា) បានបញ្ជាឱ្យអ្នកការទូតវេណេហ្ស៊ុយអេឡា ចាកចេញពីប៉េរូ ក្នុងពេល ៧២ម៉ោង បន្ទាប់ពីបក្សកាន់អំណាចរបស់វេណេហ្ស៊ុយអេឡា បានប្រកាសជ័យជម្នះក្នុងការបោះឆ្នោត ដែលក្រុមប្រឆាំង និងក្រុមអ្នកបោះឆ្នោតឯករាជ្យហៅថាមិនអាចទុកចិត្តបាន ខណៈប្រទេសប៉ាណាម៉ា ក៏ចាត់វិធានការផ្អាកទំនាក់ទំនងជាមួយប្រទេសសមាជិកអង្គការ OPEC មួយនេះផងដែរ។

ក្រសួងការបរទេសប៉េរូបានធ្វើសេចក្តីថ្លែងការណ៍នោះដោយលើកឡើងពី «ការសម្រេចចិត្តដ៏ម៉ឹងម៉ាត់ និងតាមអំពើចិត្តដែលធ្វើឡើងដោយរបបវេណេស៊ុយអេឡា»។ ប៉េរូបាននិយាយកាលពីថ្ងៃចន្ទថា ខ្លួននឹងមិនទទួលយកការរំលោភលើឆន្ទៈរបស់ប្រជាជនវេណេស៊ុយអេឡានោះទេ ហើយថាខ្លួនបានកោះហៅឯកអគ្គរដ្ឋទូតរបស់ខ្លួនមកវិញ។

ជាមួយគ្នានេះ ប្រធានាធិបតីប៉ាណាម៉ា លោក ហូសេ រ៉ាអូល មូលីណូ (Jose Raul Mulino) បាននិយាយកាលពីថ្ងៃចន្ទថា ប៉ាណាម៉ាបានផ្អាកទំនាក់ទំនងការទូតរបស់ខ្លួនជាមួយវេណេហ្ស៊ុយអេឡា ហើយនឹងដកបុគ្គលិកការទូតរបស់ខ្លួនចេញពីប្រទេសនេះរហូតដល់ការត្រួតពិនិត្យពេញលេញនៃលទ្ធផលបោះឆ្នោតប្រធានាធិបតីកាលពីថ្ងៃអាទិត្យ ត្រូវបានធ្វើឡើង។

នៅព្រឹកថ្ងៃដដែល ប៉ាណាម៉ាបានចូលរួមជាមួយប្រទេសអាមេរិកឡាទីនចំនួនប្រាំបីផ្សេងទៀតដែលអំពាវនាវឱ្យមានកិច្ចប្រជុំបន្ទាន់នៃក្រុមប្រឹក្សាអចិន្ត្រៃយ៍របស់អង្គការរដ្ឋអាមេរិក (OAS) ដោយលើកឡើងពីកង្វល់ទាក់ទងនឹងលទ្ធផលឆ្នោតរបស់វេណេស៊ុយអេឡា៕