រលកកម្ដៅជាបន្តបន្ទាប់នៅអឺរ៉ុបខាងត្បូង និងខាងកើតបានធ្វើឱ្យតម្រូវការប្រើប្រាស់ប្រចាំថ្ងៃហក់ឡើងយ៉ាងខ្លាំង ដែលបណ្ដាលឱ្យដាច់ចរន្តអគ្គិសនី និងមានកង្វះខាតទឹក។ កំណើននៃការប្រើប្រាស់ម៉ាស៊ីនត្រជាក់ និងទឹកត្រជាក់បានដាក់សម្ពាធដែលមិនធ្លាប់មានពីមុនមកលើហេដ្ឋារចនាសម្ព័ន្ធអគ្គិសនី និងទឹក ដែលបណ្តាលឱ្យប្រព័ន្ធជាច្រើនត្រូវបរាជ័យក្នុងប៉ុន្មានសប្តាហ៍ថ្មីៗនេះ។

យោងតាមសេវាបម្រែបម្រួលអាកាសធាតុរបស់សហភាពអឺរ៉ុប ផែនដីបានជួបប្រទះថ្ងៃក្តៅបំផុតក្នុងកំណត់ត្រានៅថ្ងៃទី២២ ខែកក្កដា ជាមួយនឹងសីតុណ្ហភាពជាមធ្យមប្រចាំថ្ងៃរបស់ពិភពលោកឡើងដល់កម្រិតខ្ពស់ថ្មីគឺ ១៧,១៦អង្សាសេ។

នៅទីក្រុងជាច្រើនរបស់អ៊ីតាលី បានមើលឃើញសីតុណ្ហភាពជិតដល់កម្រិតខ្ពស់បំផុត។

 ប្រទេសកោះមេឌីទែរ៉ាណេ ម៉ាល់តា បានស៊ូទ្រាំនឹងការដាច់ភ្លើងពេញមួយថ្ងៃនៅក្នុងតំបន់មួយចំនួន ខណៈរូម៉ានីក៏ជួបប្រទះនឹងកង្វះអគ្គិសនីផងដែរ។ នៅប្រទេសម៉ុងតេណេហ្គ្រោ បណ្តាញអគ្គិសនីត្រូវបានប៉ះពាល់យ៉ាងខ្លាំងក្រោមការជូនដំណឹងកម្រិតខ្ពស់បំផុតអំពីអាកាសធាតុ។

ការដាច់ចរន្តអគ្គិសនីក្នុងតំបន់កាលពីថ្ងៃទី២១ ខែមិថុនា បានបណ្តាលឱ្យប៉ះពាល់ដល់ក្រូអាស៊ី បូស្នី អាល់បានី និងប្រទេសជាច្រើនទៀត។ ទន្ទឹមនឹងនេះ ការខ្វះខាតទឹកក៏កំពុងកើតមានលើផ្នែកខ្លះនៃទ្វីបអឺរ៉ុបផងដែរ ខណៈអ៊ីតាលី និងប៊ុលហ្គារី បានទទួលរងនូវការប៉ះពាល់យ៉ាងធ្ងន់ធ្ងរ ដោយសារទឹកត្រូវបានគេរាយការណ៍ថាមានប្រើប្រាស់ត្រឹមតែពីរ ឬបីម៉ោងប៉ុណ្ណោះក្នុងមួយថ្ងៃ៕