មន្ត្រី FBI បាននិយាយកាលពីថ្ងៃចន្ទថា នគរបាល បានកត់សម្គាល់ឃើញបុរសនៅរដ្ឋ Pennsylvania ជាអ្នកដែលបានព្យាយាមធ្វើឃាតបេក្ខជនប្រធានាធិបតីរបស់គណបក្សសាធារណរដ្ឋ លោក Donald Trump រយៈពេលជាងមួយម៉ោង មុនពេលការបាញ់ប្រហារ កាលពីថ្ងៃទី១៣ ខែកក្កដា ហើយបានថតរូប ដើម្បីចែករំលែកទៅដល់មន្ត្រីអនុវត្តច្បាប់ដទៃទៀត។

លោក Kevin Rojek ភ្នាក់ងារពិសេសទទួលបន្ទុកការិយាល័យតំបន់ Pittsburgh របស់ FBI បានប្រាប់អ្នកសារព័ត៌មាន នៅក្នុងសន្និសីទស្តីពីការស៊ើបអង្កេតរបស់ទីភ្នាក់ងារថា «អ្នកបាញ់ប្រហារ ត្រូវបានកំណត់អត្តសញ្ញាណដោយមន្ត្រីអនុវត្តច្បាប់ ថា ជាមនុស្សគួរឱ្យសង្ស័យ»។

លោកនិយាយថា មន្ត្រីក្នុងតំបន់ម្នាក់ បានថតរូបភាពខ្មាន់កាំភ្លើង ឈ្មោះ Thomas Crooks ហើយបានផ្ញើវាទៅឲ្យមន្ត្រីអនុវត្តច្បាប់ផ្សេងទៀតនៅកន្លែងកើតហេតុនៃការជួបប្រជុំគ្នា នៅរដ្ឋ Pennsylvania របស់លោក Trump នៅថ្ងៃនោះ។

លោក Rojek បាននិយាយថា ប្រហែល៣០ នាទី ក្រោយមក ប្រតិបត្តិករក្រុមនគរបាល SWAT បានឃើញ ខ្មាន់កាំភ្លើង Crooks ប្រើឧបករណ៍ចាប់សញ្ញាកំណត់ចម្ងាយ និងស្វែងរកគេហទំព័រព័ត៌មាន។

លោក Rojek និយាយថា Crooks ត្រូវបានគេឃើញកាន់កាបូបស្ពាយ នៅម៉ោងប្រហែល ៥.៥៦នាទី ល្ងាច មិនដល់២០នាទីនោះទេ មុនពេលការបាញ់ប្រហារកើតឡើង ហើយនៅម៉ោង ៦.០៨នាទី ល្ងាច ខ្មាន់កាំភ្លើងរូបនេះ ត្រូវបានចាប់យករូបភាពដោយកាមេរ៉ារបស់នគរបាល ឃើញកំពុងដើរនៅលើដំបូលពីកន្លែងដែលបុរសនេះ បានបាញ់ចុងក្រោយ។

លោកនិយាយថា ទោះបីជា FBI ពុំមែនជាទីភ្នាក់ងារដែលទទួលខុសត្រូវក្នុងការស៊ើបអង្កេតការបរាជ័យណាមួយ ក្នុងការធានាសន្តិសុខសម្រាប់លោក Trump ក៏ដោយ ក៏បុគ្គលិក FBI កំពុងដាក់បញ្ចូលរួមគ្នានូវកាលវិភាគនៃព្រឹត្តិការណ៍នានា។

មន្ត្រី FBI និយាយថា ពួកគេនៅមិនទាន់កំណត់អត្តសញ្ញាណមូលហេតុជំរុញសម្រាប់ Crooks នៅឡើយ ជាខ្មាន់កាំភ្លើងអាយុ២០ឆ្នាំ ដែលត្រូវបានបាញ់សម្លាប់ដោយភ្នាក់ងារអង្គភាពសេវាសម្ងាត់ បន្ទាប់ពីការបាញ់ប្រហារ របស់បុរសនេះ។