យោងតាមការសិក្សាស្រាវជ្រាវដែលបានបង្ហាញកាលពីថ្ងៃចន្ទ ២៩ កក្កដាសប្ដាហ៍នេះ ព្រៃឈើ និងប្រព័ន្ធអេកូឡូស៊ីដីផ្សេងទៀតបានបរាជ័យក្នុងការទប់ស្កាត់ការប្រែប្រួលអាកាសធាតុក្នុងឆ្នាំ២០២៣ ខណៈគ្រោះរាំងស្ងួតខ្លាំងនៅក្នុងព្រៃអាម៉ាហ្សូន និងភ្លើងឆេះព្រៃនៅក្នុងប្រទេសកាណាដាបានរារាំងសមត្ថភាពធម្មជាតិរបស់ពួកវាក្នុងការស្រូបយកកាបូនឌីអុកស៊ីត ។

អ្នកស្រាវជ្រាវបាននិយាយថា នេះមានន័យថា បរិមាណកាបូនឌីអុកស៊ីតដ៏ខ្ពស់បំផុតមួយបានចូលក្នុងបរិយាកាសផែនដីកាលពីឆ្នាំមុន ដែលជំរុញឱ្យសីតុណ្ហភាពក្ដៅនិងរលកកម្ដៅនៅលើភពផែនដីបន្ថែមទៀត។

ក្រុមអ្នកវិទ្យាសាស្ត្រនៅសាកលវិទ្យាល័យ ស៊ីងហ័រ (Tsinghua) ក្នុងប្រទេសចិន សាកលវិទ្យាល័យ Exeter នៅចក្រភពអង់គ្លេស និងវិទ្យាស្ថានសិក្សាពីអាកាសធាតុ LSCE បានដឹកនាំការស្រាវជ្រាវទៅលើអ្វីដែលបណ្តាលឱ្យមានការផ្លាស់ប្តូរ។ ការសិក្សារបស់ពួកគេត្រូវបានបង្ហាញនៅក្នុងសន្និសីទអន្តរជាតិកាបូនឌីអុកស៊ីតនៅទីក្រុង ម៉ាណាវ (Manaus) ប្រទេសប្រេស៊ីល។

ការសិក្សាបានរកឃើញថា កត្តាជំរុញដ៏សំខាន់មួយគឺសីតុណ្ហភាពសកលលោកខ្ពស់ ដែលសម្ងួត រុក្ខជាតិនៅក្នុងព្រៃ Amazon និងព្រៃទឹកភ្លៀងផ្សេងទៀត រារាំងព្រៃឈើមិនឱ្យស្រូបយកកាបូនកាន់តែច្រើន ខណៈចំហេះព្រៃកើនឡើងខ្លាំង ក្នុងកំណត់ត្រានៅក្នុងប្រទេសកាណាដាផងដែរ។

ពួកគេបាននិយាយថា ការធ្លាក់ចុះនៃកាបូនិកនៅលើដីមាននិន្នាការកើតឡើងក្នុងឆ្នាំដែលរងផលប៉ះពាល់ដោយបាតុភូតអាកាសធាតុ អេលនីញូ (El Nino) ជាក់ស្ដែងដូចជាឆ្នាំ២០២៣។ ប៉ុន្តែសីតុណ្ហភាពខ្ពស់ដែលបណ្តាលមកពីការប្រែប្រួលអាកាសធាតុបានធ្វើឱ្យធ្លាក់ចុះយ៉ាងខ្លាំងកាលពីឆ្នាំមុន៕