លោក Donald Trump បានយល់ព្រមទទួលការសម្ភាសន៍ដោយក្រុម FBI ជាផ្នែកមួយនៃការស៊ើបអង្កេតរបស់ខ្លួនលើការប៉ុនប៉ងធ្វើឃាតនៅឯការជួបជុំយុទ្ធនាការបោះឆ្នោតក្នុងរដ្ឋ Pennsylvania កាលពីដើមខែនេះ។ នៅក្នុងការហៅទូរសព្ទជាមួយអ្នកសារព័ត៌មានកាលពីថ្ងៃចន្ទ (២៩ កក្កដា) FBI មិនបានផ្តល់កាលបរិច្ឆេទសម្រាប់ការសម្ភាសន៍នោះទេ ប៉ុន្តែបាននិយាយថា វានឹងក្លាយជា «ការសម្ភាសន៍ជនរងគ្រោះតាមស្តង់ដារដូចការសម្ភាសន៍ផ្សេងៗទៀត»។

ភ្នាក់ងារពិសេស FBI លោក ខេវិន រ៉ូជេក (Kevin Rojek) បាននិយាយថា «យើងចង់ទទួលបានទស្សនៈរបស់លោក Trump លើអ្វីដែលលោកបានសង្កេត»។ ទោះបីជាមានភស្តុតាងគរដូចភ្នំក៏ដោយ ក៏ក្រុមស៊ើបអង្កេតមិនទាន់អាចកំណត់ពីមូលហេតុដែលខ្មាន់កាំភ្លើង ថូម៉ាស ម៉ាតស៊ូ ឃ្រុកស៍ (Thomas Matthew Crooks) បើកការបាញ់ប្រហារកាលពីថ្ងៃទី១៣ ខែកក្កដា បានឡើយ។

ទន្ទឹមនឹងនោះ សារដែលទើបចេញផ្សាយថ្មីបានបង្ហាញថា ខ្មាន់កាំភ្លើងវ័យ ២០ឆ្នាំនេះត្រូវបានប្រទះឃើញជាង ៩០នាទីមុនពេលការបាញ់ប្រហារ ដោយនោះនឹងបន្ថែមទៅក្នុងបញ្ជីបរាជ័យផ្នែកសន្តិសុខដែលកើតឡើងមុនការប៉ុនប៉ងធ្វើឃាតប្រឆាំងនឹងអតីតប្រធានាធិបតីរូបនេះ។

កាលពីថ្ងៃចន្ទ FBI បាននិយាយថាក្រុមស៊ើបអង្កេតជឿថា ជនសង្ស័យ Crooks បានរៀប «ផែនការដោយប្រុងប្រយ័ត្ន» នៅមុនថ្ងៃទី១៣ ខែកក្កដា ហើយបានធ្វើ «កិច្ចប្រឹងប្រែងយ៉ាងច្រើន» ដើម្បីលាក់បាំងសកម្មភាពរបស់គេ។ ការស៊ើបអង្កេតជាច្រើនក៏ត្រូវបានដាក់ឱ្យដំណើរការជុំវិញបរាជ័យសន្តិសុខក្នុងទីលានកម្មវិធីជួបជុំរបស់លោក Trump នៅទីក្រុង បាត់ល័រ (Butler) មួយនេះ៕