ចំនួនអ្នកស្លាប់ដោយសារបំណាក់ដីនៅលើតំបន់ភ្នំនៃរដ្ឋ កេរ៉េឡា (Kerala) ភាគខាងត្បូងប្រទេសឥណ្ឌា បានកើនឡើងដល់៥៤នាក់ និងជាច្រើននាក់រងរបួស នៅថ្ងៃអង្គារ (៣០ កក្កដា) នេះ ខណៈកិច្ចខិតខំប្រឹងប្រែងជួយសង្គ្រោះត្រូវបានរារាំងបន្ទាប់ពីស្ពានដ៏សំខាន់មួយនៅក្នុងតំបន់នោះបានបាក់រលំ។ជាមួយគ្នានោះមនុស្សជាង១០០នាក់ ត្រូវគេបារម្ភថាបានបាត់ខ្លួន។

រដ្ឋមន្ត្រីព្រៃឈើប្រចាំរដ្ឋ លោក អេខេ សាស៊ីនដ្រាន (A K Saseendran) បានប្រាប់សារព័ត៌មានរ៉យទ័រ បន្ទាប់ពីបំណាក់ដីនៅស្រុក វ៉ាយ៉ាណាត (Wayanad) នៃរដ្ឋនេះថា កងទ័ពកំពុងប្រើខ្សែសន្ដោងដើម្បីសាងសង់ស្ពានបណ្តោះអាសន្នមួយ បន្ទាប់ពីស្ពាននៅក្នុងស្រុកតភ្ជាប់តំបន់រងគ្រោះទៅកាន់ទីក្រុង ឆូរ៉ាល់ម៉ាឡា (Chooralmala) ដែលនៅជិតបំផុតត្រូវបានបំផ្លាញ។

ទូរទស្សន៍ក្នុងស្រុក អាស៊ីណេត ធិវី (Asianet TV) បាននិយាយថា មនុស្សរហូតដល់ជាង៥០នាក់បានស្លាប់បន្ទាប់ពីបំណាក់ដីដែលបណ្តាលឱ្យមានការបំផ្លិចបំផ្លាញនៅក្នុងតំបន់។ រដ្ឋមន្ត្រីសុខាភិបាលប្រចាំរដ្ឋ លោកស្រី វីណា ចច (Veena George) បាននិយាយថា មនុស្សជាង ៧០នាក់រងរបួស។ សារព័ត៌មាន ឥណ្ឌាអ៊ិចស្ព្រេស (Indian Express) បានរាយការណ៍ថា មនុស្សជាច្រើនទំនងជាត្រូវបានទឹកនាំហូរទៅឆ្ងាយនៅក្នុងទន្លេ ចាលីយ៉ា (Chaliyar)។

មនុស្សម្នាក់ដែលចូលរួមក្នុងកិច្ចខិតខំប្រឹងប្រែងជួយសង្គ្រោះបានប្រាប់រ៉យទ័រថា មានបំណាក់ដីយ៉ាងហោចណាស់បីកន្លែងនៅក្នុងតំបន់នេះ។ នាយកដ្ឋានឧតុនិយមរបស់ឥណ្ឌា បានព្យាករថានឹងមានភ្លៀងធ្លាក់ខ្លាំងបន្ថែមនៅក្នុងរដ្ឋនៅថ្ងៃអង្គារនេះ៕