ប្រធានាធិបតីអ៊ីរ៉ង់លោក Masoud Pezeshkian និងសមភាគីបារាំងលោក Emmanuel Macron កាលពីថ្ងៃចន្ទ បានផ្លាស់ប្តូរទស្សនៈស្តីពីការស្តារឡើងវិញនូវកិច្ចព្រមព្រៀងនុយក្លេអ៊ែរឆ្នាំ ២០១៥ រវាងទីក្រុងតេអេរ៉ង់ និងមហាអំណាចពិភពលោក និងការដកទណ្ឌកម្ម។

នៅក្នុងការសន្ទនាតាមទូរស័ព្ទដែលមានរយៈពេលមួយម៉ោង លោក Pezeshkian បានបង្ហាញពីការត្រៀមខ្លួនរបស់អ៊ីរ៉ង់ ក្នុងការធ្វើឲ្យប្រសើរឡើងនូវទំនាក់ទំនងជាមួយប្រទេសបារាំង ដោយផ្អែកលើភាពស្មោះត្រង់ និងការកសាងទំនុកចិត្តគ្នាទៅវិញទៅមក។ នេះបើយោងតាមសេចក្តីថ្លែងការណ៍ដែលបានចេញផ្សាយនៅលើគេហទំព័ររបស់ការិយាល័យប្រធានាធិបតីអ៊ីរ៉ង់។

លោក Pezeshkian បានសម្តែងការត្រៀមខ្លួនរបស់អ៊ីរ៉ង់សម្រាប់ការបន្តកិច្ចចរចានុយក្លេអ៊ែរ ក្នុងក្របខ័ណ្ឌដែលបានព្រមព្រៀងគ្នា ដើម្បីដកទណ្ឌកម្មចេញពីទីក្រុងតេអេរ៉ង់ ដោយនិយាយថា ការបំពេញកាតព្វកិច្ចរបស់ភាគីទាំងអស់ និងការបញ្ឈប់សម្ពាធ និងទណ្ឌកម្មដ៏ខ្លាំងក្លាប្រឆាំងនឹងប្រជាជនអ៊ីរ៉ង់ គឺជាចំនួនតិចបំផុតដែលអ៊ីរ៉ង់រំពឹងថានឹងទទួលបានពីកិច្ចព្រមព្រៀងនុយក្លេអ៊ែរ និងមូលដ្ឋានអំណោយផលសម្រាប់ជំរុញការចរចា។

លោកបាននិយាយថា អ៊ីរ៉ង់បានបំពេញកាតព្វកិច្ចទាំងអស់របស់ខ្លួន ក្រោមកិច្ចព្រមព្រៀងនុយក្លេអ៊ែរ ដែលត្រូវបានគេស្គាល់ជាផ្លូវការថា ជាផែនការសកម្មភាពគ្រប់ជ្រុងជ្រោយរួម (JCPOA) ដូចដែលបានផ្តល់សក្ខីកម្មដោយទីភ្នាក់ងារថាមពលបរិមាណូអន្តរជាតិ នៅក្នុងរបាយការណ៍ចំនួន១៥ ដោយកត់សម្គាល់ថា ទោះជាយ៉ាងណាក៏ដោយ ជនជាតិអាមេរិក មិនបានបំពេញកាតព្វកិច្ចរបស់ពួកគេទេ គឺបានដកខ្លួនជាឯកតោភាគីចេញពីកិច្ចព្រមព្រៀងក្នុងឆ្នាំ ២០១៨ និងបានដាក់ទណ្ឌកម្មដ៏ធ្ងន់ធ្ងរបន្ថែមលើប្រជាជនអ៊ីរ៉ង់។

ចំណែកលោក Macron បានស្វាគមន៍ចំពោះវិធីសាស្រ្តរបស់ប្រធានាធិបតីអ៊ីរ៉ង់ក្នុងការលើកកម្ពស់ទំនាក់ទំនងនិងរក្សាតុល្យភាពនៅក្នុងគោលនយោបាយការបរទេសរបស់ប្រទេសនេះ ដោយបង្ហាញក្តីសង្ឃឹមថា ទំនាក់ទំនងរបស់អ៊ីរ៉ង់ជាមួយបារាំង និងរដ្ឋអឺរ៉ុបផ្សេងទៀត នឹងប្រសើរឡើងបន្ថែមទៀត ក្នុងអំឡុងពេលអាណត្តិរបស់លោក Pezeshkian។