ការចូលរួមប្រកួតកីឡាអូឡាំពិក មិនដូចអ្វីដែលយើងគិត និងចង់ចូលរួមប្រកួតនោះទេ។ ចំនួនប្រជាជនច្រើន តិច នៃប្រទេសនីមួយៗក្នុងពិភពលោក​ក៏មិនកំណត់​ចំនួន​អត្ត​ពលិក​ចូលរួមប្រកួតតិច ច្រើននោះដែរ។

ការប្រកួតកីឡាអូឡាំពិក មានភាពខុសពីការប្រកួតកីឡាក្នុងតំបន់ដូចជាស៊ីហ្គេម Commonwealth Games Pan America EuroGames ។ល។ ព្រោះកីឡា​ប្រចាំ​តំបន់​មានកីឡាពីរប្រភេទដាក់ឱ្យប្រកួត គឺកីឡាអូឡាំពិក និងមិនមែនអូឡាំពិក ហើយមិនតម្រូវប្រកួតជម្រុះ។

និយាយដោយឡែក ឧទាហរណ៍ក្នុងករណីស៊ីហ្គេម២០២៣ពេលកម្ពុជាធ្វើម្ចាស់ផ្ទះ កម្ពុជាមានប្រតិភូអត្តពលិកជិត៩០០នាក់ចូលរួម ដណ្តើមបានមេដាយ២២៨គ្រឿង (មាស៨១ ប្រាក់៧៤ សំរឹទ្ធ១២៧) ដែលភាគច្រើនដណ្តើមបានលើប្រភេទកីឡាមិនមែនអូឡាំពិកដូចជា គុនខ្មែរ ល្បុក្កតោ វ៉ូវីណាម ឃីកបុកស៊ីង ប៉េតង់ ជាដើម។

ស៊ីហ្គេមមានអត្តពលិកច្រើន ហេតុអ្វីអូឡាំពិកមានតែបីនាក់?

ការប្រកួតកីឡាអូឡាំពិក ជាការប្រកួតប្រជែងកីឡាកម្រិតខ្ពស់ ហើយប្រភេទកីឡាដាក់ឱ្យប្រកួតសុទ្ធតែកីឡាអូឡាំពិកដែលកំណត់ដោយគណៈកម្មាធិការអូឡាំពិកអន្តរជាតិ (IOC)។

លោក ញ៉ាន សុខវិសាល នាយបេសកកម្មអូឡាំពិកកម្ពុជា បានពន្យល់ថាដើម្បីបានចូលប្រកួតអូឡាំពិក អាស្រ័យលើលក្ខខណ្ឌបីគឺៈ

 1 Universal Place program

ប្រភេទកីឡាហែលទឹក និង អត្តពលកម្ម ជាប្រភេទកីឡាដែលអត់មិនបានសំរាប់មូលដ្ឋានគ្រឹះកីឡា (Compulsory Sports) ហើយកីឡាទាំង២ប្រភេទនេះក៏មានវិញ្ញាសាច្រើនផងដែរ ដែលអាចផ្តល់ឱកាសអោយកីឡាករ កីឡាការិនីចូលរួម ដូចនេះហើយទើប IOC ដាក់ប្រភេទកីឡាទាំង២នេះក្នុងកម្មវិធី Universal Place នេះ គឺក្នុងន័យផ្តល់សិទ្ធអោយ ប្រទេស រឺ NOCs ណាដែលមិនមានអត្តពលិក ជាប់វគ្គជម្រុះ (Qualified Athletes) ដោយហេតុថាកីឡាអូឡាំពិកតម្រូវអោយប្រជាជាតិទាំង២០៦(NOCs)ទាំងអស់ចូលរួម ចឹងគឺ IOC ផ្តល់សិទ្ធចូលរួមពិសេសចំនួន២ប្រភេទកីឡា ហែលទឹក(កីឡាករ១ រូប កីឡាការិនី ១រូប) និងកីឡាអត្តពលកម្ម (កីឡាករ១ រូប កីឡាការិនី ១រូប) លើកលែងតែអូឡាំនៅជប៉ុន២០២០លើកមក២០២១ និងអូឡាំពិកប៉ារីស២០២៤គឺកាត់អត្តពលកម្ម១រូប។

2-Tripartite commission invitation places (Wild Card)

កម្មវិធីនេះសំរាប់ប្រទេសរឺ NOCs ណាដែលបានបញ្ជូនអត្តពលិកខ្លួនទៅចូលរួមប្រកួតវគ្គជម្រុះហើយតែមិនបានជាប់តែអត្តពលិកនោះមានកម្រិតបច្ចេកទេសល្អ នុះ សហព័ន្ធអន្តរជាតិ IFs និង IOC និងធ្វើការពិចារណាផ្តល់សិទ្ធ Wild card អោយចូលរួម។ បញ្ជាក់ថាកម្មវិធីនេះតម្រូវអោយសាមុីប្រទេស រឺ NOCs ដាក់ពាក្យសុំ ហើយមានតែប្រទេសរឺ NOC ដែលមានអត្តពលិកចូលរួម តិចជាង៨នាក់កាលពីការប្រកួតអូឡាំពិក២ដងមុន តែប៉ុណ្ណោះដែលអាចមានសិទ្ធ ស្នើសុំបាន ហើយមិនងាយនិងទទួលបានទេសិទ្ធនេះ។ (ជាក់ស្តែងកាលពីអូឡាំពិកនៅក្រុរីយូ ប្រទេស ប្រេសុីល ២០១៦ កម្ពុជាទទួលបានសិទ្ធនេះមួយកៅអី គឺកីឡាការនីចំបាប់ ចូវ សុធារ៉ា )។

3- Qualification Program

កម្មវិធីនេះគឺសំរាប់តែអត្តពលិកដែលមានសិទ្ធផលនិងគុណវឌ្ឍន៍ខ្ពស់ដែលឈ្នះវគ្គប្រកួតជម្រុះក្នុងតំបន់ (Olympic Qualification Competition) រឺសំរាប់តែអត្តពលិកដែលមានកម្រិតRanking ខ្ពស់ដែលបានជាប់ជាស្វ័យប្រវត្តិដោយមានកំណត់ត្រា Ranking ដោយសហព័ន្ឋអន្តរជាតិ IFs។ (ជាក់ស្តែងកាលពីអូឡាំពិកនៅក្រុងរីយ៉ូ ប្រទេសប្រេសុីល កម្ពុជាបានទទួលសិទ្ធនេះជាប្រវត្តិសាស្រ្តរបស់កម្ពុជា ដោយវិរៈកីឡាការិនី ស៊ន សៀវមុី បានប្រកួតឈ្នះវគ្គជម្រុះទទួលបានមេដាយមាសនៅក្នុងការប្រកួតវគ្គជម្រុះក្នុងតំបន់ ហើយមានសិទ្ធពេញលេញក្នុងការប្រកួតអូឡាំពិក២០១៦។

ដូច្នោះហើយទើបកម្ពុជាមានតែអត្តពលិកបីនាក់ចូលរួមប្រកួតក្នុងលក្ខខណ្ឌទី១ កីឡាខ្វះមិនបានរបស់អូឡាំពិក (អត្តពលកម្ម និងហែលទឹក)។ ចំណែកប្រទេសមួយចំនួនធំទៀតដែលមានចំនួនប្រជាជនច្រើនជាងកម្ពុជា មានអត្តពលិកតិចចូលរួមប្រកួតដែរ៕ អត្ថបទៈ គង់ ហួន