យោងតាមរដ្ឋបាលឧតុនិយមកូរ៉េ (KMA) កាលពីថ្ងៃចន្ទ (ទី២៩ ខែកក្កដា) បានឲ្យដឹងថា ការព្រមានអំពីរលកកម្ដៅ និងបាតុភូតអាកាសធាតុត្រូពិចនាពេលរាត្រី ត្រូវបានរំពឹងថា នឹងបន្តកើតមានពេញមួយសប្តាហ៍នេះ ដោយមានភ្លៀងធ្លាក់ជាបន្តបន្ទាប់ នៅក្នុងតំបន់ Greater Seoul និងផ្នែកខ្លះនៃខេត្ត Gangwon រហូតដល់ចុងសប្តាហ៍។

នៅថ្ងៃអង្គារ (ទី៣០ ខែកក្កដា) នេះ សីតុណ្ហភាពពេលថ្ងៃ ត្រូវបានរំពឹងថា នឹងឡើងដល់ ៣៦អង្សាសេ ដោយទឹកភ្លៀងត្រូវបានព្យាករមានចន្លោះពី ៥មីលីម៉ែត្រ ទៅ ៣០មីលីម៉ែត្រ សម្រាប់ផ្នែកខ្លះនៃខេត្ត Gyeonggi និង Gangwon ហើយមានកម្រិតចន្លោះពី ៥មីលីម៉ែត្រ ទៅ ១០មីលីម៉ែត្រ សម្រាប់ទីក្រុងសេអ៊ូល និងផ្នែកភាគខាងជើងនៃខេត្ត Chungcheong។

គួរបញ្ជាក់ថា របាយការណ៍អាកាសធាតុបានកើតឡើង ខណៈដែលផ្នែកភាគច្រើននៃប្រទេស បានឃើញនូវនាត្រីដែលមានអាកាសធាតុត្រូពិច កាលពីថ្ងៃទី២៩ ខែកក្កដា។ 

យោងតាម KMA បានឲ្យដឹងថា នៅទីក្រុង Sokcho ខេត្ត Gangwon សីតុណ្ហភាពទាបបំផុត នាពេលយប់ គឺ ៣០,៦អង្សាសេ ដោយនេះជាយប់ដែលមានអាកាសធាតុក្តៅបំផុត ក្នុងកំណត់ត្រា គិតចាប់តាំងពីខែសីហា ឆ្នាំ២០០៨ មក៕